ग्यास वितरण सहज बनाउन काठमाडौं महानगर प्रहरी सक्रिय, डिपोमा अनुगमन र सहजीकरण सुरु

काठमाडौं | महानगर प्रहरी बलले बजारमा उपलब्ध एलपी ग्यासको निष्पक्ष र सहज वितरण सुनिश्चित गर्न अनुगमन तथा सहजीकरण अभियान सुरु गरेको छ।

लामो समयसम्म ग्यास नपाएको, पहुँच भएका उपभोक्ताले मात्रै सहज रूपमा ग्यास पाएको तथा विद्यार्थीलगायत सर्वसाधारणले ग्यास अभावको गुनासो गरेपछि महानगर प्रहरी डिपोस्तरमै वितरण व्यवस्थापनमा सक्रिय भएको हो।

महानगर प्रहरी बलका प्रमुख वरिष्ठ नगर प्रहरी उपरीक्षक विष्णुप्रसाद जोशीका अनुसार बजारमा उपलब्ध ग्यास सबै उपभोक्तासम्म समान रूपमा पुग्ने वातावरण बनाउन प्रहरीको भूमिका रहनेछ।

उनले ग्यास वितरणसँगै सिलिन्डरको म्याद, तौल, फायर एक्स्टिङ्ग्विसरको उपलब्धता, भण्डारणको अवस्था, सुरक्षा मापदण्ड तथा ढुवानीका जोखिमबारे पनि नियमित अनुगमन गरिने जानकारी दिए। उनका अनुसार चारवटै क्षेत्रीय टोलीमार्फत यस्ता सूचकका आधारमा निरन्तर सहजीकरण गरिनेछ।

अभियानको सुरुआतस्वरूप मंगलबार अनामनगर क्षेत्रका ग्यास डिपोहरूको अनुगमन गरिएको थियो। अनुगमनका क्रममा साना डिपोमा ग्यास पर्याप्त मात्रामा उपलब्ध रहेको भेटिए पनि ठूला डिपोमा ग्यास प्राप्त गर्ने आशमा उपभोक्ताको उल्लेख्य भीड देखिएको थियो।

यसैबीच, नेपाल आयल निगमले भने विगतझैँ नियमित परिमाणमा ग्यास आपूर्ति भइरहेको जनाएको छ। निगमका अनुसार बजारमा देखिएको असन्तुलन आपूर्तिका कारण नभई उपभोक्ताको माग अस्वाभाविक रूपमा बढेकाले भएको हो।