आइपिएलमा आज दुई खेल हुदै

काठमाडौँ । इन्डियन प्रिमियर लिग (आईपीएल) अन्तर्गत आज दुई महत्वपूर्ण खेल हुँदैछन्। आजको पहिलो खेलमा सनराइजर्स हैदरावाद र कोलकोता नाइट राइडर्स आमनेसामने हुनेछन्। हैदरावादमा हुने यो खेल नेपाली समयअनुसार दिउँसो ३:४५ बजे सुरु हुनेछ।
जारी सिजनमा हैदरावादले ९ खेलमध्ये ६ जित र ३ हारसहित १२ अंक जोड्दै अंक तालिकाको तेस्रो स्थानमा मजबुत स्थिति बनाएको छ।

उता कोलकोताको सुरुवात भने अपेक्षाअनुसार हुन सकेको छैन। ८ खेलमा २ जित र ५ हार बेहोरेको टोलीले पछिल्ला दुई खेल जित्दै पुनरागमनको संकेत दिएको छ। त्यस्तै, आजको दोस्रो खेलमा गुजरात टाइटन्स र पञ्जाब किंग्स भिड्दैछन्। अहमदावादमा हुने यो खेल नेपाली समयअनुसार साँझ ७:४५ बजे सुरु हुनेछ।

गुजरातले हालसम्म ९ खेलमा ५ जित र ४ हारसहित १० अंक जोड्दै पाँचौं स्थानमा रहेको छ। यता पञ्जाबले उत्कृष्ट प्रदर्शन गर्दै ८ खेलमा १३ अंकका साथ अंक तालिकाको शीर्ष स्थानमा कब्जा जमाएको छ।