मन्त्रीहरूलाई देउवाको चेतावनी: ‘भ्रष्टाचार गरेको थाहा पाएँ भने बाँकी राख्दिनँ’

काठमाडौं/ ४ माघ,नेपाली कांग्रेसका सभापति शेरबहादुर देउवाले पार्टीबाट अहिलेको सरकारमा सहभागी मन्त्रीहरुलाई नैतिक आचरणमा रहेर कार्यसम्पादन गर्न निर्देशन दिनुभएको छ। सरकारमा सहभागी पार्टीका मन्त्रीहरुसँगको छलफलको क्रममा बिहिवार सभापति देउवाले मन्त्रीहरुको कार्यसम्पादन पार्टीको भविष्यसँग जोडिएको विषय भएकोले काम गरेर देखाउन र जनताको मन जित्न सुझाव दिनुभएको हाे।
मन्त्रीहरुलाई सुशासनको सवालमा निर्मम भएर प्रस्तुत हुनपनि उहाँले निर्देशन दिनुभएको थियो। बैठकमा सहभागी एक मन्त्रीले दिएको जानकारीअनुसार देउवाले भ्रष्टाचार गरेको थाहा पाए कोहीपनि मन्त्रीहरुलाई बाँकी नराख्ने चेतावनी दिनुभएको थियो सो क्रममा उहाँले अबको एक महिनाभित्रै कार्यसम्पादन रिपोर्ट आफूलाई बुझाउन पनि निर्देश गर्नुभएको छ।
देउवाले अहिलेको सत्ता–सहकार्यमा एमालेसँग कुनै मतभेद नभएको भन्दै त्यहीअनुसार प्रस्तुत हुनपनि मन्त्रीहरुलाई निर्देशन दिनुभएको छ। उहाँको भनाई उद्धृत गर्दै वन तथा वातावरणमन्त्री ऐनबहादुर शाहीले भन्नुभयो, ‘सभापतिज्यूले अहिले सरकारमा मतभेद छैन भनेर भन्नुभएको छ। उहाँले हामीलाई प्रधानमन्त्रीले भनेको मान्ने र प्रधानमन्त्रीलाई सहयोग गर्न भन्नुभएको छ।’
सभापति देउवाले अहिले आएका विभिन्न पाँच अध्यादेशआफ्नै सहमतिमा आएको पनि जिकिर गर्नुभएको छ। उहाँले आफू र प्रधानमन्त्री ओलीबीच कुनै असहमति नभएकोपनि स्पष्ट पार्नुभएकाे थियो ।