देशभर मोबाइल ब्यवसायीको आन्दोलन

मुग्लान न्युज २०८१ भाद्र २६, बुधबार , प्रकाशित अर्थतन्त्र | समाचार

काठमाडौं/ भदौ २६, मोबाइल ब्यवसायी महासंघले आजबाट देशभर सामसुङ नेपालका मोबाइल फोनको भिजिबिलिटी बन्द गर्ने घोषणा गरेको छ।
ब्यवसायीले उठाएको मुद्दालाई बेवास्ता गरेको र कार्यक्रम नै बिथोलिन पुगेको भन्दै ब्यवसायीहरुको छाता संगठन महासंघले सामसुङ नेपालका विरुद्ध आन्दोलनका कार्यक्रम घोषणा गरेको हो। सुदुरपश्चिमको धनगढीमा गत भाद्र २० गते सामसुङ नेपालले सुदुरपश्चिम प्रदेशका नौ जिल्लाका मोबाइल ब्यवसायीका लागि लक्षित गर्दै आयोजना गरेको रिटेल मीट कार्यक्रममा ब्यवसायीहरुले मार्जिनको बिषय उठाउँदा कार्यक्रम नै भाडिएको थियो। सो कार्यक्रम ब्यवसायीहरुले बहिष्कार नै गरेका थिए।

नेपाल मोबाइल ब्यवसायी महासंघका केन्द्रीय अध्यक्ष भरत भट्टराईले महासंघ केन्द्रले उठाएको बिषय प्रदेश संरचनाबाट उठ्नु स्वभाविक भएको र उठेका मुद्दालाई समन्वय गर्नु पर्नेमा कार्यक्रम आयोजकले त्यसलाई सम्बोधन गर्न नसक्नु दु:खद भएको बताए।
`ब्यवसाय सम्बन्धि कुनै पनि बिषय कार्यक्रमका शिलशिलामा उठ्छन, मार्जिनको बिषय त केन्द्रको चासोको बिषय नै थियो,त्यो स्वभाविक पनि हो, कार्यक्रममा उठेका बिषयलाई सामसुङ नेपालले सम्बोधन गर्नु पर्नेमा वातावरण झन बिथोल्ने अवस्था बन्यो, यो सुखद होइन,´ महासंघका केन्द्रीय अध्यक्ष भट्टराईले भने।

महासंघले सोही बिषयलाई लिएर आन्दोलनका कार्यक्रम घोषणा गरेको हो। जस अनुसार आज र भोलि देशभर सामसुङ ब्राण्डका मोबाइलको भिजिबिलिटी(मोबाइल डिस्प्ले) पसलबाट हटाउने र यो दुई दिनमा पनि कम्पनीमार्फत वार्ता र सहमतिको वातावरण नबनाइए थप दुई दिन (२८ र २९ भाद्र) कम्पनीका ब्यवसायीक प्रतिनिधि (प्रमोटर) लाई फिर्ता पठाउने निर्णय भएको अध्यक्ष भट्टराईले जानकारी दिए ।
महासंघका उपाध्यक्ष रमेश घिमिरेले महासंघले उठाएको बिषयलाई सम्बोधन गरेर वातावरण सहज बनाउने दिशामा कम्पनीले चासो नदिए पहिलो चरणको दवाबमुलक कार्यक्रम पछि थप कार्यक्रम घोषणा गरिने बताए।
धनगढीमा आयोजित रिटेल मीटमा ब्यवसायीहरुले मोबाइल बिक्री गर्दा प्राप्त गर्ने मार्जिन बढाउन आग्रह गरेका थिए। तर सामसुङ नेपालका प्रतिनिधिहरुले भने सो बिषयका लागि कार्यक्रम आयोजना नगरिएको भन्दै ब्यवसायीहरुलाई जुन कार्यक्रमका लागि बोलाइएको त्यो बाहेक अन्य बिषयमा छलफल नै नहुने जवाफ दिएका थिए। महासंघका सुदुरपश्चिम अध्यक्ष सुरेश सापकोटाले आयोजकले ब्यवसायीहरुलाई अपमानित व्यवहार गरेकाले त्यसपछी ब्यवसायीहरु कार्यक्रम नै बहिष्कार गरेर हिडेको बताएका थिए।

मुग्लान न्युजमा प्रकाशित कुनै समाचारमा तपाईंको गुनासो भए हामीलाई muglannews02@gmail.com मा इमेल गर्न सक्नुहुनेछ । साथै तपाई आफ्नो बिजनेश प्रवद्र्धन गर्न चाहनुहुन्छ भने muglannews02@gmail.com मा सम्पर्क गर्न सक्नुहुनेछ । हामीसँग तपाईं फेसबुक र ट्विटरमा पनि जोडिन सक्नुहुन्छ ।