ललितपुर चापागाउँदोबाटोकाे भाटभटेनीलाई दस हजार जरिवाना

ललितपुर/१ माघ, संयुक्त जिल्ला बजार अनुगमन समिति ललितपुरले चापागाउँदोबाटोकाे भाटभटेनीलाई दस हजार जरिवाना गरेकाे छ।
ललितपुरका सहायक प्रमुख जिल्ला अधिकारी कल्पना घिमिरेकाे नेतृत्वमा खटिएको संयुक्त बजार अनुगमन समितिले साेमबार अनुगमन गर्दा भाटभटेनीमा म्याद उल्लेख नगरिएको तथा मापदण्डअनुसार प्याकेजिङ समेत नगरिएको इम्लीकाे अचार फेला परेको थियाे।
“म्याद उल्लेख नगरिएको इम्लीकाे आचार भेटिएपछि एउटा प्याकेज गुणस्तर जाँचका लागि पठाउने बाँकी अचार जफत गरिएकाे छ। हामीले अहिले सचेतनाका लागि उपभोक्ता संरक्षण ऐन, २०७५ को दफा ३९ उपदफा २ (क) बमोजिम अनुचित व्यापारिक क्रियाकलाप गरेकाले सोही ऐनको दफा ३८ (ङ) बमोजिमको कसुरमा दफा ३९ बमोजिम दस हजार मात्रै जरिवाना गरिएको छ।” सहायक प्रमुख जिल्ला अधिकारी घिमिरेले भन्नुभयो ।
उपभोक्ता संरक्षण ऐन, २०७५ अनुसार बजार अनुगमन गर्दा साेही बुँदामा पाँच लाखसम्म जरिवाना गर्न सक्ने अवस्था रहेकाे उपभोक्ता हीत संरक्षण मञ्च ललितपुरका अध्यक्ष ध्रुबलाल तण्डुकारले जानकारी गराउनुभयाे ।

त्यस्तै, संयुक्त जिल्ला बजार अनुगमन समिति ललितपुरले चापागाउँदाेवाटाेकाे मकवानपुर फष्टफुड र ए टु जेड स्टाेरमा समेत अनुगमन गरि देखिएका कमजोरी सुधार्न सचेत गराएकाे अनुगमन समितिका सदस्य एवम् नेपाल पत्रकार महासंघका अध्यक्ष रामहरि कार्कीले जानकारी गराउनुभयाे। मकवानपुर फास्टफूडले स्थानीय तहमा दर्ता नगरी व्यवसाय सञ्चालन गरेको र ए टु जेड स्टाेरले मुल्यशुचि नराखेकाे पाइएकाे थियाे ।
हरेक हप्ता फरकफरक ठाउँमा छड्के बजार अनुगमन गर्दै आएकाे संयुक्त जिल्ला बजार अनुगमन समिति ललितपुरले हात्तीवनस्थित अपार भेजिटेवल सस उद्योगलाई पचास हजार रुपैयाँ जरिवाना गराएकाे उद्योग तथा वाणिज्य कार्यालय ललितपुरका भानु पाण्डेले जानकारी गराउनुभयाे। —