इन्जिनमा आगो लागेको टर्किस एयर कोलकत्तामा सकुशल अवतरण

काठमाडौं। त्रिभुवन अन्तर्राष्ट्रिय विमानस्थलबाट उडान गर्दा आगो लागेको टर्किस एयरको विमान कोलकत्तामा सकुशल अवतरण भएको छ । त्रिभुवन अन्तर्राष्ट्रिय विमानस्थल कार्यालयका अनुसार, बुधबार टर्किस एयरलाइन्सको उडान नम्बर टीके–७२७ ए–३३३ बिमान दिउँसो १ बजेर २९ मिनेटमा त्रिभुवन अन्तर्राष्ट्रिय विमानस्थलबाट उडेको थियो ।

उडान भरेको केही समयपछि फोर डीएमई वेस्ट क्षेत्रमा विमानको दायाँ इन्जिनमा आगलागी भएको संकेत देखिएपछि ‘राइट इन्जिन अन फायर’ भन्दै काठमाडौं एप्रोच कन्ट्रोलमा जानकारी गराइएको थियो ।
घटनापछि जहाजलाई केही समय आकाशमै होल्ड गराई आवश्यक प्रक्रिया पूरा गरिएको थियो । त्यसपछि सुरक्षाका कारण भारतको कोलकत्ता (भीईसीसी) विमानस्थलतर्फ डाइभर्ट गरिएको विमानस्थल कार्यालयले जनाएको छ । जहाज निर्धारित समयअनुसार दिउँसो ३ बजेर ३ मिनेटमा कोलकत्ता विमानस्थलमा सुरक्षित अवतरण गरिएको हो ।

उक्त जहाजमा चालक दलका ११ सदस्यसहित २२५ यात्रु सवार रहेका थिए । सबै यात्रु तथा चालक दल सुरक्षित रहेको विमानस्थल कार्यालयले जनाएको छ ।