मन्त्रिपरिषद् बैठकका निर्णय सार्वजनिक

काठमाण्डौँ / २६ पुस ,गत पुस २३ गते (मंगलबार) साँझ बसेको मन्त्रिपरिषद् बैठकले विभिन्न ६ वटा निर्णयहरू गरेको छ ।

बैठकले सशस्त्र प्रहरी बलका ४ जना नायब महानिरीक्षकहरूको पदावधि थप गर्ने निर्णय गरेको छ।

पुस २६ र २७ गते (शुक्रबार र शनिबार) हुने नेपाल–भारत वाणिज्य सचिवस्तरीय अन्तरसरकारी समितिको बैठकमा छलफलका लागि कार्यसूची स्वीकृत गरिएको छ। यस बैठकमा सहभागी हुन उद्योग, वाणिज्य तथा आपूर्ति मन्त्रालयका सचिवको संयोजकत्वमा वार्ता टोली गठन गर्ने निर्णय गरिएको छ।

फागुन १२ देखि १५ गतेसम्म इटालीको रोममा आयोजना हुने जनवायु परिवर्तनसम्बन्धी कार्यक्रममा वन तथा वातावरण राज्यमन्त्री रुपा विश्वकर्मालाई सहभागी हुने स्वीकृति प्रदान गरिएको छ।

सहरी विकास मन्त्रालयका सहसचिव विष्णुप्रसाद शर्मालाई विशिष्ट संरचना सञ्चालन तथा व्यवस्थापन विकास समितिको कार्यकारी निर्देशकको रूपमा काम गर्न काजमा खटाउने निर्णय गरिएको छ।

परराष्ट्र मन्त्रालयका कायम मुकायम सचिव अमृतबहादुर राईलाई बढुवा गरी सोही मन्त्रालयमा पदस्थापन गर्ने निर्णय भएको छ।