“अपाङ्गता भएका व्यक्तिहरुको दैनिकीमा सहजीकरण गर्न महानगरले  हरसम्भव प्रयास गर्ने”

ललितपुर/१७ मंसिर, ललितपुर महानगरपालिकाका प्रमुख चिरीबाबु महर्जनले अपाङ्गता भएका व्यक्तिहरुको दैनिकीमा सहजीकरण गर्न महानगरले  हरसम्भव प्रयास गर्ने बताउनुभयो।
अपाङ्गता भएका व्यक्तिहरुको ३४ओैं अन्तर्राष्ट्रिय दिवसको अवसरमा आज बुधबार ललितपुर महानगरपालिकाद्वारा जावलाखेलमा आयोजित समारोहमा मन्तव्य राख्नुहुँदै महानगरप्रमुख महर्जनले महानगरले निर्माण गरेका सबै सार्वजनिक संरचना अपाङ्गतामैत्री छन् भन्दै सेवा प्रवाहमा पनि कुनै समस्या नहुने बताउनुभएको हो।
“अपाङ्गता भएका व्यक्तिहरुसंग पनि सपाङ्ग भन्दा बढि क्षमता रहेको हामीले देखेकै छौँ, तपाईंहरुको दैनिक जीवनमा आवश्यक पर्ने सेवाका लागि महानगर सदैव तत्पर रहने छ।” उहाँले भन्नुभयो ।
उहाँले जेन जेड आन्दोलनका क्रममा अपाङ्गतामैत्री सवारी साधन जलाइएकोमा दु:ख व्यक्त गर्दै त्यसको परिपूरणका लागि अर्को सुविधासम्पन्न प्रविधिमैत्री सवारी किन्ने तयारी भैसकेको जानकारी गराउनुभयो।

महानगर उपप्रमुख मञ्जली शाक्य बज्राचार्यले अपाङ्गता भएका व्यक्तिहरुको रचनात्मक गतिविधि अगाडि बढाउनका लागि सक्रिय भूमिका निर्वाह गर्ने जानकारी गराउँदै उनीहरुलाई अवसर दिने कामका तीनै तहको सरकार र संघसंस्था मिलेर अगाडि बढ्नुपर्नेमा जोड दिनुभयो।

ललितपुर महानगरपालिकाको प्रमुख प्रशासकीय अधिकृत रेखा दास श्रेष्ठले महानगरले अपाङ्गता भएका व्यक्तिहरुको सेवा, सुविधालाई जोड दिंदै दैनिक जीवन सहज बनाउन ध्यान दिएको बताउनुभयो। उहाँले अपाङ्गता भएका व्यक्तिहरुलाई समाजको मूल प्रवाहमा ल्याएर सम्मानपूर्ण जीवन जिउने अवसर प्रदान गर्न सबै एकजुट भएर अगाडि बढ्नुपर्नेमा जोड दिनुभयो।

जिल्ला प्रहरी परिसर ललितपुरका सूचना अधिकारी प्रहरी उपरीक्षक चक्रराज जोशीले अपाङ्गता भएका व्यक्तिहरुको सम्मानपूर्वक बाँच्न पाउने अधिकारको रक्षाका लागि प्रहरीले हरप्रहर सहयोग गर्ने जानकारी गराउँदै उनीहरुलाई पहिलो प्राथमिकतामा राखेर सहयोग गर्ने बताउनुभयो। उहाँले अपराधिक मानसिकता हुने र खराब काममा लाग्नेहरुले अपाङ्गता भएका व्यक्तिहरुलाई प्रयोग गरेर गलत काम र स्वार्थ सिद्ध गर्न खोज्ने हुँदा सचेत रहन पनि आग्रह गर्नुभयो।

मानसिक अस्पतालका निर्देशक डाक्टर सुरज तिवारीले अपाङ्गता भएका व्यक्तिहरुको प्रतिभा प्रस्फुटनले अपाङ्गता हुनुले उनीहरूको विकासका लागि राम्रो काम हो भन्नुभयो। उहाँले अपाङ्गता हुनु भनेको सबै कुरा नहुनु हैन भन्दै शारीरिक, बौद्धिक, मानसिक लगायत विभिन्न किसिमका अपाङ्गता भएकाहरु फरकफरक क्षमता हुने भएकोले उनीहरूका फरकफरक क्षमता प्रस्फुटनका लागि समाज र राज्यले आवश्यक सुविधा दिनुपर्ने बताउनुभयो।

शारीरिक अपाङ्गता भएका व्यक्तिहरुको संघका निवर्तमान अध्यक्ष किरण सिल्पकारले ललितपुर महानगरले अपाङ्गता भएका व्यक्तिहरुको पहुँच हरेक क्षेत्रमा सहज बनाउने कार्यमा राष्ट्रिय स्तरमै उत्कृष्ट काम गरेको भन्दै प्रशंसा गर्नुभयो।
महानगरको कार्यपालिका सदस्य एवम् अपाङ्गता स्थानीय समन्वय समितिका सदस्य लक्ष्मी शर्मा दाहालले अपाङ्गता भएका व्यक्तिहरुको दैनिक जीवनको सहजीकरणका साथै उनीहरूको क्षमता विकासकालागि नगरपालिकाले तथ्यांक संकलन गरेर शिक्षा, स्वास्थ र हेरचाहका लागि आवश्यक सहयोग, सहकार्य र समन्वय गरिरहेको बताउनुभयो। उहाँले अपाङ्गता भएका बालबालिकाको हीतकाका साथै उनीहरूमा भएको ज्ञान, सीप र क्षमता प्रस्फुटनका लागि महानगरले विभिन्न किसिमका कार्यहरु गर्नेगरि नीतिगत व्यवस्था गरेको जानकारी गराउनुभयो।
सन् १९८१ मा संयुक्त राष्ट्रसंघले डिसेम्बर ३ तारिकलाई अपाङ्गता दिवस घाेषणा गरेकाे थियो । अपाङ्गता भएका व्यक्तिहरूको अधिकार प्रवर्द्धन, समावेशीकरण, शसक्तिकरण र अपाङ्गताका विविध सवालहरूमा सामाजिक चेतना अभिवृद्धि गर्ने उद्देश्यले विश्वमा अपाङ्गता भएका व्यक्तिहरूको अन्तराष्ट्रिय दिवस सन १९९२ वाट मनाउन थालिएको हो । यो दिवस हरेक वर्ष विभिन्न अन्तराष्ट्रिय नाराहरूका साथ डिसेम्वर ३ मा मनाउने गरिन्छ । यस वर्ष “अपाङ्गता समावेशी समाजको प्रवर्द्धन :सामाजिक उन्नतिको सम्बर्द्धन” भन्ने राष्ट्रिय नाराका साथ यस वर्षको अन्तर्राष्ट्रिय अपाङ्गता दिवस मनाइँदै छ ।