विद्यालय तहको शिक्षा नि:शुल्क गर्न सरकारलाई नेपाली कांग्रेसकाे ध्यानाकर्षण

ललितपुर/ १७ भदौ, विद्यालय तहको शिक्षा नि:शुल्क गर्न सरकारलाई ध्यानाकर्षण गराउने निर्णय नेपाली कांग्रेसकाे केन्द्रीय समितिले पारित गरेको छ। पार्टीको २०८१ भाद्र १६ गते बसेको केन्द्रीय कार्य समितिको बैठकले विद्यालय शिक्षा पूर्ण रुपमा निःशुल्क बनाउने र वर्तमान शिक्षा क्षेत्रमा देखिएका तमाम समस्या समाधानका लागि उचित कदम चाल्न नेपाली कांग्रेस नेपाल सरकारको ध्यानाकर्षण गराएकाे हाे ।

“यस वर्ष प्रकाशित एसइई र कक्षा १२ को परिक्षाफलमा अधिकांश विद्यार्थी अनुत्तिर्ण भएको परिस्थितिलाई नेपाली कांग्रेसले गम्भीर चिन्ताको रूपमा लिएको छ । राष्ट्रको सर्वाङ्गीण विकासका लागि किशोर किशोरीको शिक्षा र रोजगारीमा विशेष ध्यान दिनु पर्ने कुरामा हाम्रो अटुट विश्वास छ। बिग्रदो शैक्षिक अवस्थालाई सुधार गरी स्वदेशमै सर्वसुलभ र गुणस्तरीय शिक्षा तथा रोजगारीका अवसर निर्माण गर्न नेपाली कांग्रेसले विषय विज्ञ एवं सरोकारवालाहरुको परामर्शबाट गरी विद्यालयदेखि विश्वविद्यालयसम्मको समयसापेक्ष ‘शिक्षा नीति’ निर्माण गर्नेछ । विद्यालय शिक्षा पूर्ण रुपमा निःशुल्क बनाउने र वर्तमान शिक्षा क्षेत्रमा देखिएका तमाम समस्या समाधानका लागि उचित कदम चाल्न नेपाली कांग्रेस नेपाल सरकारको ध्यानाकर्षण गर्दछ ।” पार्टीको केन्द्रीय समितिकाे निर्णयमा भनिएकाे छ।

कक्षा १२ सम्मको पढाई देशमा नि:शुल्क हुनु पर्दछ भनेर अभियान चलाउदै आउनुभएका पूर्वमन्त्री, नेपाली कांग्रेस केन्द्रीय सदस्य एवम्  सिन्धुपाल्चोकका सांसद माेहनबहादुर बस्नेतले पार्टीको केन्द्रीय समिति बैठकमा धारणा राख्दै याे प्रस्ताव गर्नुभएको थियाे ।

बस्नेतले जिल्लाका एस.एल.सी परीक्षामा सहभागी हुने सम्पुर्ण विद्यार्थीहरु र छिमेकी जिल्लाका गरिब र जेहेन्दार विद्यार्थीहरुलाई सबै विषयहरुमा २०४१ साल देखि ३२ वर्ष सम्म नि:शुल्क ‘कोचिङ्ग’ कक्षा सञ्चालन गरि पढाउने कार्य गर्नुभएको थियो। उहाँले नेपाली कांग्रेस पार्टीमा आवद्ध रहेर शिक्षा, स्वास्थ्य, सामाजिक अभियान र विकास निर्माणका क्षेत्रमा नेतृत्वदायी भूमिका निर्वाह गर्दै आउनुभएको छ।