वीरगंजलाई आर्थिक राजधानी र ठाकुरराम क्याम्पसलाई विश्व विद्यालय बनाउने : रन्जु साह

वीरगंज, २३ माघ | आम जनता पार्टी (आजपा)का नेतृ एवं पर्सा क्षेत्र नं. २ की उम्मेदवार रन्जुकुमारी साहले वीरगंजको ठाकुरराम बहुमुखी क्याम्पसलाई विश्व विद्यालय र नारायणी अस्पताललाई मेडिकल कलेज बनाउने प्रतिबद्धता व्यक्त गरेकी छन् ।

पर्सा क्षेत्र नं. २ को पर्सागढी, फुलवरिया, रघुनाथपुर, बहुअर्वा, सोङगड, पकडिया, मानवा, एकटांगा, हर्दिया सहित विभिन्न गाउँमा मतदाता एवं पार्टी नेताकार्यकर्तासंगको आज चुनावी छलफल तथा भेटघाटका क्रममा उनले यस्तो प्रतिबद्धता व्यक्त गरेकी हुन् ।

‘म अहिले चुनावी छलफल तथा भेटघाटको क्रममा छु । मैले निर्वाचनमा बिजयी भएपछि ठाकुरराम बहुमुखी क्याम्पसलाई विश्व विद्यालय, नारायणी अस्पताललाई मेडिकल बनाउने, नारायणी रंगशाला, आदर्शनगरको रंगशाला लगायतका यहाँका महत्वपूर्ण बिषय काम गर्ने प्रतिबद्धता मेरो छ,’ पर्सा–२ की उम्मेदवार साहले भनिन् ।
पर्साबाट आम जनताको भोट लिएर चुनाव जित्ने, सांसद, मन्त्री हुने तर काम नगर्ने समस्याले आम मतदाताले आक्रोश व्यक्त गरिरहेको उनले बताइन । पर्सा मुलुककै आर्थिक राजधानी र प्रवेशद्धार भए पनि यहाँको विकासमा यहाँबाट भोट लिएर सांसद मन्त्री हुनेहरुले ध्यान नदिएको गुनासो आइरहेको उनले बताइन् ।

वीरगंजलाई मुलुककै आर्थिक राजधानी बनाउनका लागि पहल गर्ने बताउदै साहले यहाँको उधोग, व्यापार, व्यवसायलार्य व्यवस्थित गर्दै थप रोजगारको सृजना गर्ने, स्थानीयलाई रोजगार, शिक्षा, स्वास्थ्य, यातायात लगायतको क्षेत्रमा प्रभावकारी काम गर्ने उनले बताइन् ।

नेताहरुले ध्यान नदिदा एकटांगाको पुल १९ बर्षदेखी अधुरो, अपुरो रहेकाले सबभन्दा पहिला त्यसलाई निर्माण सम्पन्न गर्न पहल गर्ने उनले बताइन् । यस्तै हर्दिया, तिलावको पुल नबन्दा यहाँका सर्वसधारण नागरिकले दुख व्यवहोर्नुपर्ने बाध्यताको अन्त्य गर्नका लागि काम गर्ने साहले जनाएकी छन् ।

‘आफू बिजयी भएपछि पार्टीका श्रदेय अध्यक्ष प्रभु साहको श्रीमती तथा रौतहटको मौलापुर नगरपालिकाका मेयर रिना साहले आफ्नो पालिकामा गर्नुभएको कामलाई यहाँ लागु गर्नेछु,’ आजपा नेतृ साहले भनिन् ।

मौलापुर नगरपालिकामा शुन्य कर नीति अनुसार कर लाग्दैन, पानी, बिजुली, शिक्षा, स्वास्थ्य लगायतका सेवा सुविधाहरु निशुल्क रहेको छ । छोरीको जन्मदेखी, शिक्षा, स्वास्थय, विवाह लगायतमा पालिकाले सहयोग गर्दै आएको छ । छोरीको विवाहमा पालिकाले अभिभावकको भुमिका निर्वाह गर्दै ३० हजार नगद सहयोग गर्दै आएको बताउदै उनले पर्सामा पनि यो सबै सेवासुविधा लागु गरिने बताइन् ।