विशेष अदालतमा न्यायाधीश फेरियो , थारुको सरुवा कोइरालालाई तोक्न सिफारिस

काठमाडौ/ १२ पुस,न्याय परिषदले भ्रष्टाचारको मुद्दा हेर्न विशेष अदालतमा न्यायाधीश परिर्वतन गरेको छ। प्रधान न्यायाधीश प्रकाशमान सिंह राउतको नेतृत्वमा बसेको न्याय परिषदको शुक्रबारको वैठकले विशेषमा एक सदस्यमात्र परिर्वतन गर्ने निर्णय गरेको हो । विशेष अदालतमा लामो समयदेखि रहेका न्यायाधीश खुशीप्रसाद थारुको सरुवा गरेको छ। थारुलाई उच्च अदालत जनकपुरको विरगञ्ज इजलासमा सरुवा गरिएको छ। उनको स्थानमा विदुर कोइरालालाई तोक्न परिषदले सिफारिस गरेको हो । परिषदको सिफारिसमा मन्त्रीपरिषदले नियुक्ती गर्ने छ ।

थारु विशेष अदालतमा मुख्य न्यायाधीश श्रीकान्त पौडेलको टिम हुदाँदेखि कायम थिए । परिषदले यस पटक उनलाई सरुवा गरेर कोइरालालाई ल्याएको हो ।

विशेषमा अहिले टेकनारायण कुँबरको नेतृत्वमा रहेको छ। विशेषमा कुँबरसहित पाँच जनाको टोली रहेको छ।

विशेषमा तेजनारायण सिंह राई, रामबहादुर थापा ,मुरारीबाबु श्रेष्ठ र रितेन्द्र थापा सदस्य रहेका छन् । विशेषमा कम्तिमा दुई वटा इजलास गठन हुने गरि ६ जना न्यायाधीशको दरबन्दी रहेको छ। अख्तियार दुरुपयोग अनुसन्धान आयोगले दर्ता गर्ने भ्रष्टाचार मुद्दाहरु विशेषले सुनुवाई गर्ने गर्दछ । विशेषले पछिल्लो समय निकै प्रशंसायोग्य काम गरिहेको भनि प्रधानन्यायाधीशले नै तारिफ गर्दे आएका छन् । विशेषले पुराना मुद्दाहरु सकेको छ भने कम्तिमा ६ महिना पुराना मुद्दामात्र बाँकी राखेको छ।