रास्वपा दैलेखमा निर्वाचन विवाद : २४० मत खसेको दाबी, गणनामा २४६ मत देखिएको आरोप

काठमाडौँ । राष्ट्रिय स्वतन्त्र पार्टी (रास्वपा) दैलेखको प्रथम जिल्ला अधिवेशन सम्पन्न भएसँगै मतगणना प्रक्रियालाई लिएर विवाद उत्पन्न भएको छ। मतदान विवरण र सार्वजनिक मतपरिणामबीच असमानता देखिएको भन्दै असन्तुष्ट पक्षले जिल्ला पार्टी कार्यालयमा तालाबन्दी गरेको छ।

सभापति पदका उम्मेदवार प्रकाशकुमार बुढाले निर्वाचन प्रक्रियाको निष्पक्ष छानबिनको माग गर्दै तालाबन्दी गरिएको जानकारी दिए। उनका अनुसार निर्वाचन समितिले कुल २४० मत खसेको जनाएको भए पनि सभापति पदका उम्मेदवारहरूले प्राप्त गरेको मत जोड्दा २४६ पुग्ने देखिएको छ।

जिल्ला सभापति चयनका लागि चार जना उम्मेदवार प्रतिस्पर्धामा थिए। सर्वसम्मतिबाट नेतृत्व चयन हुन नसकेपछि आइतबार मध्यरातमा मतदान प्रक्रिया सञ्चालन गरिएको थियो।

असन्तुष्ट पक्षले मतगणना प्रक्रियामा देखिएको भनिएको त्रुटाबारे निष्पक्ष अनुसन्धान गरी वास्तविकता सार्वजनिक गर्न माग गरेको छ। यद्यपि, विवादबारे निर्वाचन समितिको औपचारिक प्रतिक्रिया हालसम्म सार्वजनिक भएको छैन।