द्विपक्षीय लगानी प्रवर्द्धन तथा सुरक्षा सम्झौता अपरिहार्य – राजदूत थेयङ

काठमाडौं/ १६ असाेज, नेपालका लागि गणतन्त्र कोरियाका राजदूत पार्क थेयङले नेपाल र काेरियाबीच द्विपक्षीय लगानी प्रवर्द्धन तथा सुरक्षा सम्झौता अपरिहार्य भएकोमा जाेड दिनुभएको छ।
गणतन्त्र कोरियाको राष्ट्रिय दिवस २०८१ को अवसरमा गणतन्त्र कोरियाकाे दूतावासद्वारा मंगलबार (अक्टोबर १ तारिकमा) यहाँ आयोजित समारोहमा  मन्तव्य राख्नुहुँदै राजदूत थेयङले कोरिया र नेपालबीच कूटनीतिक सम्बन्ध स्थापना भएको ५० वर्ष पुगेको चर्चा गर्दै राजदूत थेयङले द्विदेशीय मैत्री एवं सहयोग विस्तारका निम्ति आफू प्रतिबद्ध रहेको बताउनुभयाे । उहाँले नेपालमा अधिकभन्दा अधिक लगानी भित्र्याउन आफू क्रियाशील रहेको बताउँदै सामसुङ र हुन्डेजस्ता ठूला कम्पनीका उत्पादन नेपालमा प्रारम्भ भएसँगै नेपालीले स्वदेशमा नै रोजगारीका अवसर पाउन थालेका बताउनुभयाे ।
उपराष्ट्रपति रामसहायप्रसाद यादव गणतन्त्र कोरियाको राष्ट्रिय दिवसका अवसरमा नेपालका लागि राजदूत पार्क थेयङले मंगलबार आयोजना गरेको स्वागत समारोहमा सरिक हुनुभएकाे थियो । समारोहमा नेपाल सरकारका विभिन्न मन्त्रालयका मन्त्रीहरु, संसद सदस्यहरु, कुटनीतिक नियोगका प्रमुखहरु, नेपाल सरकारका उच्च पदस्थ कर्मचारीहरु, अन्तर्राष्ट्रिय संघ संस्थाका प्रतिनिधिहरू, व्यवसायी, पत्रकार तथा प्रबुद्ध व्यक्तिहरूका साथै नेपालमा रहेका कोरियाली नागरिकहरुको उपस्थिति रहेको थियो
नेपालमा थप कोरियाली लगानी आकर्षित गर्न द्विपक्षीय लगानी प्रवर्द्धन तथा सुरक्षा सम्झौता अपरिहार्य भएको चर्चा गर्दै राजदूत थेयङले नेपालसँग आफ्नो मुलुकले निर्माण साझेदारी, जलविद्युत् आयोजना निर्माण, त्रिभुवन अन्तरराष्ट्रिय विमानस्थलको स्तरोन्नति, सडक, अस्पताल, व्यावसायिक भवन निर्माणलगायत भौतिक विकासका परियोजना कार्यान्वयन गरेको जानकारी गराउनुभयाे ।
रोजगार अनुमति प्रणालीअन्तर्गत सन् २००७ यता १ लाखभन्दा बढी नेपालीले कोरियामा रोजगारी पाएका तथा हाल कोरियामा ७० हजार नेपाली रहेका बताउँदै उनीहरूबाट जनस्तरको सम्बन्धलाई अझ सुदृढ तुल्याउन बल मिलेको बताउनुभयाे ।
‘समृद्ध नेपाल, सुखी नेपाली’को राष्ट्रिय आकांक्षा पूरा गर्ने नेपाल सरकारको लक्ष्यका साथै सन् २०२६ मा विकासशील राष्ट्रमा स्तरोन्नत हुने र त्यसपछि यसको दिगोपना सुनिश्चित गर्न कोरियाले सक्दो सहयोग गर्ने राजदूत थेयङले बताउनुभयाे ।
समारोहमा कोरियाली संस्कृति झल्कने विविध सांस्कृतिक कार्यक्रम पनि प्रस्तुत गरिएको थियो। त्यस अवसरमा राजदूत थेयङले हालैको बाढीपहिराबाट भएको अमूल्य जनधनको क्षतिप्रति गहिरो दुःख व्यक्त गर्दै कोरिया सरकार र जनताका तर्फबाट हार्दिक सहानुभूति एवं ऐक्यबद्धता प्रकट गर्नुभयाे।