वालेन सरकारको सुशासनको धज्जी उडाउदै मन्त्री प्रतिभा रावल

रौतहट, २७ जेठ ।
विकास निर्माणका कार्यलाई तिब्रता दिनुपर्ने समयमा प्रमुख प्रशासकीय अधिकृत बेपता भएका छन् । रौतहटको मौलापुर नगरपालिकाका प्रमुख प्रशासकीय अधिकृत (उपसचिव) सुरेशबाबु घिमिरे दुई महिनादेखी बेपता भएका छन् ।

भुमी व्यवस्था, सहकारी, संघीय मामिला तथा सामान्य प्रशासन मन्त्रालयले खटाएका उपसचिव घिमिरे कार्यालयमा उपस्थित भएर काम गर्नुको साटो जिल्ला बाहिर बसेर सुशासनको धज्जी उडाई रहेकाछन् । मन्त्रालयले घिमिरेलाई गत १६ चैतमै मौलापुर नगरपालिकामा खटाएको थियो ।

तर घिमिरे अहिलेसम्म १५ दिनभन्दा बढी कार्यालयमा उपस्थित भएका छैनन् । उनी कार्यालयमा उपस्थित भएर तोकिएको जिम्मेवारी पुरा गर्नुको साटो प्रधानमन्त्री वालेन शाहको सुशासनलाई नै चुनौति दिएका छन् । घिमिरे कार्यालयमा उपस्थित नहुने, तोकिएको काम नगर्ने लगायतका बारेमा सामान्य प्रशासन मन्त्री प्रतिभा रावल जानकार भए पनि दुवै मिलेर वालेन सरकारको सुशासनको धज्जी उडाउन लागि परेका छन् ।

वालेन सरकारले सुशासन कायम राख्ने भन्दै कडाइका साथ लागेपनि सामान्य प्रशासन मन्त्री रावल, मौलापुरका प्रशासकीय अधिकृत घिमिरेले सुशासनलाई नै लगौंटी लगाइदिएका छन् । प्रशासकीय अधिकृत घिमिरे वेपता भएपछि खोजी गरिदिन भन्दै स्थानीय सेवाग्राहीले माग गरेका छन् ।

‘मौलापुर नगरपालिकाका प्रमुख प्रशासकीय अधिकृत हालसम्म अनुपस्थित हुनुहुन्छ । गत चैत १६ गते नै मन्त्रालयले खटाएका उपसचिव सुरेशबाबु घिमिरेज्यू हालसम्म जम्मा १५ दिन मात्र कार्यालयमा उपस्थित हुनुभएको छ । बजेट कार्यान्वयनको यस निर्णायक समयमा प्रमुख प्रशासकीय अधिकृत यसरी गायब हुनु सुशासन हो कि अत्याचार ? मौलापुरप्रति सरकार किन पूर्वाग्रही बनेको ? के मौलापुरको असफलतामा सरकारले आफ्नो विजय ठानेको हो ? यदि होइन भने, यसरी लापरबाही गर्ने कर्मचारीलाई तुरुन्त कारबाही गरियोस् ,’ स्थानीय सुरेन्द्र कुशवाहाले सामाजिक सञ्जालमा लेखेका छन् ।

लुकीलुकी बस्ने, कार्यालयमा उपस्थित नहुने, सर्वसधारणको समस्या समाधान नगर्ने, नगरपालकाको बजेट कार्यान्वयनलाई असफल बनाउने काममा लागेको मौलापुरका जनप्रतिनिधिहरु बताउँछन् । नगरपालिकाको लोकप्रिय कार्यक्रमहरु निःशुल्क बिजुली, निःशुल्क पानी, छोरीसँग मेयर कार्यक्रम जस्ता जनमुखी योजनाहरूको भुक्तानी माथिको आदेश भन्दै प्रशासकीय अधिकृत घिमिरेले रोक्ने षडयन्त्र गरेपछि स्थानीय सेवाग्राही आन्दोलित छन् ।

प्रशासकीय अधिकृत घिमिरे कार्यालयमा उपस्थित नभएर बेपता भएपछि मेयर रिनाकुमारी साहले तीन दिने स्पष्टीकरण सोधेकी छन् । २५ जेठमा सोधिएको स्पष्टीकरणको बोधार्थ सामान्य प्रशासन मन्त्रालय, जिल्ला प्रशासन कार्यालय गौरलाई समेत जानकारी एवं आवश्यक कार्यार्थका लागि उल्लेख गरिएको छ ।

नगरपालिकामा हाजिर भए पश्चात विदा स्वीकृत नगराई लामो समयसम्म घिमिरे कार्यालयमा अनुपस्थित रहदै आएको, नगरसभाबाट स्वीकृत नगर गौरव लगायतका योजनाहरु कार्यान्वयन तर्फ तत्परता नदेखाएका कारण नगरपालिकाबाट हुने सेवा प्रवाहमा गम्भीर असर परेको लगायतका कारण देखाउदै सोधिएको स्पष्टीकरणको बारेमा सामान्य प्रशासन मन्त्री रावललाई बोधार्थ गर्दा समेत कुनै चासो नदिएको देखिएको छ ।

स्पष्टीकरण सोध्नुभन्दा अघि ११ जेठमा मेयर साहले सामान्य प्रशासन मन्त्रालयलाई सहजिकरण गरिदिन पत्र समेत लेखेकी छन् । प्रशासकीय अधिकृत कार्यालयमा उपस्थित नहुने, कार्यालयको काम पनि नगर्ने सहितका व्यवहोराबाट आजित मेयर साहले सम्पूर्ण विवरण खोलाई सहजिकरण गरिदिन मन्त्री रावललाई पत्राचार गर्दा समेत कुनै वास्ता गरिएन ।

संघीय मामिला तथा सामान्य प्रशासन मन्त्री रावल, प्रशासकीय अधिकृत घिमिरे सहितकाले मनोमानी गर्न थालेपछि मेयर साहले गैरकानूनी रुपमा संघीय सरकारको भइरहेको हस्तक्षेप बन्द गर्न चुनौती दिएकी छन् ।

स्थानीय तहले गर्दै आएको देशकै नमुना मानिने जनमुखी लोकप्रिय कार्यक्रमहरु प्रमुख प्रशासकीय अधिकृतको असहयोगका कारण कार्यक्रम नै अन्योलमा परेको छ ।