बारामा भन्सार स्थापना मुख्य मुद्दा बनाउँदै चुनावी मैदानमा आजपा उम्मेदवार बिजय यादव

कलैया, १५ फागुन
जेनजी हत्यारा, लुटेरा, भ्रष्टाचारी एवं हाइजैकरलाई बहिष्कार गरौं र जेनजीको माग पुरा गर्नका लागि यसपटक मोबाइलमा मतदान गरौं भन्दै आम जनता पार्टी (आजपा) बारा–१ का उम्मेदवार बिजय यादव निर्विजले घरदैलो अभियानलाई तिब्रता दिएका छन् ।

बाराको बारागढी गाउँपालिकाको गडहल सहितका विभिन्न गाउँमा उनले आज घरदैलो गर्दैै बारामा अनिर्वाय रुपमा भन्सार कार्यालय स्थापाना गर्ने आफ्नो एजेण्डा रहेको बताए ।

बारा जिल्लाको समग्र आर्थिक विकास र सीमावर्ती व्यापारको व्यवस्थित विस्तारलाई केन्द्रमा राख्दै यादवले भन्सार कार्यालय स्थापना आफ्नो प्रमुख चुनावी प्रतिबद्धता भएको स्पष्ट पारेका छन् ।

यसअघि घरदैलो तथा मतदाता भेटघाट कार्यक्रम अन्तर्गत सिम्रौनगढ नगरपालिकाका विभिन्न वडामा आयोजित सभालाई सम्बोधन गर्दै उनले सीमावर्ती क्षेत्रको आर्थिक सम्भावनालाई मूर्त रूप दिन स्थानीय तहमै भन्सार कार्यालय स्थापना गराउने प्रतिबद्धता व्यक्त गरेका छन् ।

कृषि उत्पादन, साना तथा मझौला उद्योग र सीमावर्ती व्यापारको उल्लेखनीय सम्भावना हुँदाहुँदै पनि भन्सार संरचनाको अभावले स्थानीय व्यवसायीलाई अन्य जिल्लामा धाउनुपर्ने बाध्यता रहेको बताए । यसका कारण ढुवानी खर्च वृद्धि, समयको क्षति तथा प्रशासनिक झन्झट थपिएको उनको भनाइ छ ।

‘स्थानीय स्तरमै भन्सार कार्यालय स्थापना भए व्यापारिक गतिविधि तीव्र हुन्छ, राजस्व संकलन बढ्छ र बाराको अर्थतन्त्र चलायमान बन्छ,’ यादवले भने ।

उनले भन्सार कार्यालय स्थापना भएपछि अवैध आयात–निर्यात नियन्त्रणमा आउने, राजस्व चुहावट न्यूनीकरण हुने र सीमावर्ती बजार पारदर्शी तथा व्यवस्थित बन्ने विश्वास व्यक्त गरे । साथै यसबाट स्थानीय युवाहरूका लागि रोजगारी सिर्जना हुनुका साथै उद्यमशीलतामा समेत टेवा पुग्ने उनले बताए ।

यादवले भन्सार स्थापना केवल राजनीतिक मुद्दा नभई बाराको दीर्घकालीन समृद्धिसँग जोडिएको रणनीतिक आवश्यकता भएको उल्लेख गरे । ‘हामी जनताको मागलाई केन्द्रमा राखेर संघीय सरकार र सम्बन्धित मन्त्रालयसँग प्रभावकारी पहल गर्छौं,’ उनले भने ।

उनको यो एजेन्डाले बारा क्षेत्रमा आर्थिक विकाससम्बन्धी बहसलाई नयाँ आयाम दिएको छ । स्थानीय उद्योगी–व्यवसायी र सर्वसाधारणले अब भन्सार कार्यालय स्थापनाका लागि ठोस निर्णय र कार्यान्वयनको अपेक्षा गरेका छन् ।

बारा सहित समग्र मधेसको विकास र समृद्धिका लागि यसपटक मोबाइल छापमा मतदान गर्न उनले अपिल गरेका छन् । बाराको समग्र विकाश सहित धार्मिक, सांस्कृतिक, ऐतिहासिक क्षेत्रको समृद्धि एवं विकासका लागि संघर्ष गर्दै आएको बताउदै उनले यसक्षेत्रको विकासका लागि निरन्तर अग्रपंक्तिमा रहेर काम गर्ने बताए ।

स्थिरता, सुशासन, बदलाव र विकास, जनउत्तरदायी–लोकतान्त्रिक अभ्यास, सिस्टम सुधार, सुशासनको आधार, दलतन्त्र विरुद्ध आम जनताको सरकार र पहिचान, सम्मान, समृद्धि र श्रेष्ठताका लागि यसपटकको निर्वाचनमा सबै पार्टीमा भएका राम्रा मान्छेहरु एकजुट भएर अगाडी बढनुपर्ने उनले बताए ।