पञ्चमहालक्ष्मी मन्दिर परिसर (श्रीवन धाम) मा सञ्चालित श्रीमद्भागवद् पितृमुक्ति महायज्ञ–२०८३ समापन

मुना न्यौपाने ,काठमाडौँ । भक्तपुरको चाँगुनारायण नगरपालिका वडा नं. ५ स्थित श्री पञ्चमहालक्ष्मी मन्दिर परिसर (श्रीवन धाम) मा सञ्चालित श्रीमद्भागवद् पितृमुक्ति महायज्ञ–२०८३ आजदेखि समापन हुँदैछ । पितृहरूको मोक्ष र शान्तिको कामना गर्दै आयोजना गरिएको यस महायज्ञमा हजारौँ भक्तजनहरूले सहभागी भई पितृ तर्पण र पूजा अर्चना गरेका थिए।

अनन्त श्रीविभूषित मुक्तिनाथपीठाधीश्वर स्वामी कमलनयनाचार्य श्रीजी महाराज (मुक्तिनाथ बाबाज्यू)को सत्संकल्पमा आयोजित महायज्ञमा स्वामी कमलनयनाचार्यज्यूको उपस्थितिमा पूर्णाहुति र महाप्रसाद वितरणसँगै महायज्ञ सफलतापूर्वक सम्पन्न भएको श्री महायज्ञ सम्पादन मूल समितिले जनाएको छ ।

यसैबीच, काठमाडौँको शङ्खरापुर नगरपालिका वडा नं. ५, ईटाखेल मा नयाँ वर्षको सुरुवातसँगै सुरु भएको ‘श्री नेपालआमा राष्ट्रिय महायज्ञ–२०८३’ भव्य रूपमा सञ्चालन भइरहेको छ। वैशाख १ गतेदेखि सुरु भएको यो महायज्ञ आगामी वैशाख १५ गतेसम्म चल्नेछ।

राष्ट्रिय भावना जागृत गराउने र मुलुकको समग्र कल्याणको लक्ष्य राखिएको यस महायज्ञमा दैनिक रूपमा आध्यात्मिक प्रवचन, हवन र भजन कीर्तन भइरहेका छन्। महायज्ञमा काठमाडौँ उपत्यका लगायत आसपासका क्षेत्रबाट दर्शनार्थीहरूको ठूलो घुइँचो लाग्ने गरेको छ। दिवङ्गत जिवात्माहरुको भगवतधाम प्राप्तीको लागि कामना गर्दै श्री नेपालआमा एवं देवपिृतको प्रसन्नताद्वारा राष्ट्रशान्ति र सुसमृद्धिको कामनासहित जल, प्रकृति, पर्यावरण र समस्त प्राणी मात्रको कल्याणको लागि महाज्ञत आयोजना गरिएको महायज्ञ संयोजक श्रीमती दयालक्ष्मी कटुवालले बताइन् ।