सिन्धुलीमा बसको ठक्करपछि कार सुनकोसी नदीमा खस्यो, तीन जना बेपत्ता

रामेछाप । सिन्धुलीको फिक्कल गाउँपालिका–२ स्थित नवलपुर पुल नजिक बसको ठक्करपछि एक यात्रुवाहक कार सुनकोसी नदीमा खसेको छ।

जिल्ला प्रहरी कार्यालय सिन्धुलीका अनुसार काठमाडौंबाट ओखलढुंगातर्फ जाँदै गरेको बागमती प्रदेश ०८–००१ ख ०१४४ नम्बरको गणेश हिमाल तराई यातायातको बससँग ठोक्किएपछि कार नदीमा खसेको हो। प्रत्यक्षदर्शीहरूले बसको ठक्करपछि कार सीधै सुनकोसी नदीमा खसेको बताएका छन्।

प्रहरीका अनुसार कारमा एक जना निर्माण व्यवसायी, एक जना अपरेटरसहित तीन जना सवार रहेको प्रारम्भिक जानकारी प्राप्त भएको छ। उनीहरूको अवस्था भने अहिलेसम्म खुल्न सकेको छैन।

घटनालगत्तै नेपाल प्रहरी, सशस्त्र प्रहरीको गोताखोर टोली तथा स्थानीयवासीको संयुक्त टोलीले नदीमा खोज तथा उद्धार कार्य जारी राखेको छ।

घटनाबारे थप विवरण आउन बाँकी रहेको प्रहरीले जनाएको छ।