आजपा केन्द्रीय कमिटीको बैठकको निष्कर्ष : निर्वाचन शान्तिपूर्ण तर स्वच्छता र पारदर्शितामाथि प्रश्नैप्रश्न

काठमाडौं, ७ चैत । आम जनता पार्टी (आजपा)ले २१ फागुनमा सम्पन्न प्रतिनिधिसभाको निर्वाचन शान्तिपूर्ण रुपमा सम्पन्न भएको देखिएपनि यसको स्वच्छता र पारदर्शितामाथि प्रश्न उठाएको छ ।

काठमाडौंको कमलादीस्थित् नेपाल प्रज्ञा प्रतिष्ठानमा आज (शनिबार) सम्पन्न आजपाको केन्द्रीय कमिटी बैठकमा आफ्नो धारणा राख्दै केन्द्रीय सदस्य एवं उम्मेदवारहरुले निर्वाचनको स्वच्छता र पारदर्शितामाथि गम्भिर प्रश्न उठाएका छन् ।
‘मतदान अधिकृतको हस्ताक्षर नमूना पहिला नै सुरक्षा निकायले संकलन गर्नु, मतदान प्रतिनिधिलाई मतपेटिकासंगै जान नदिनु, मतपेटिका संकलन केन्द्रमा प्रतिनिधिको पहुँच नहुनु र मतपत्र छपाईबारे विवादस्पद भनाई बाहिर आउनु जस्ता विषयले निर्वाचनमा धाँधली भएको आशंका पैदा भएको छ,’ बैठकमा नेताहरुले राखेको धारणाको सारांश उद्धृत गर्दै आजपा संगठन विभाग प्रमुख त्रिभुवन साहले भने ।

यसैगरी आम संचारमाध्यम पनि सामाजिक सञ्जालमा निर्भर रहेको र सामाजिक मीडिया फेक आईडीको क्याप्चरमा रहेको सन्दर्भमा अन्य पार्टीको विचार र एजेण्डाहरू सहज ढंगले मतदातामा प्रवाहित हुन नसकेको भन्दै आजपाका नेताहरुले प्रतिस्पर्धा समान र स्वच्छ नदेखिएको निश्कर्ष सुनाएका थिए ।

‘आम संचार माध्यम र सामाजिक सञ्जालद्वारा गरिएको अतिरञ्जित र एकतर्फी प्रचारलाई निर्वाचन आयोग र नेपाल सरकारले निगरानी र नियन्त्रण गर्न नसकेको । आचार–संहिताको खुलमखुला उल्लंघन हुँदा निर्वाचन आयोग मुकदर्शक देखिएको, निर्वाचनमा हावाहुरी, सत्ताशक्ति र सत्यनिष्ठा बीचको प्रतिस्पर्धा देखिएको । जेनजी आन्दोलनको रापतापबाट आएको ह्वीमले निर्वाचनलाई पुरै प्रभावित गरेको, चुनाव समयमा हुने÷नहुने अन्यौलताका कारण पनि कयौं पार्टी र उम्मेदवारहरू गतिहिन भएका, सम्पन्न निर्वाचनको परिणाम पनि अस्वाभाविक र अप्रत्याशित देखिएको निष्कर्ष आजपा बैठकले निकालेको छ ।

बैठकले पार्टीको आगामी कार्ययोजनाको बारेमा छलफल गर्दै निर्वाचनको समिक्षासहित पार्टीको सम्पूर्ण कमिटीहरु पुर्नगठन गर्ने, पार्टीको नियमित बैठकसंगै जनसंगठनहरूको पनि बैठक र भेला गर्ने निर्णय गरेको छ ।

यसैगरी विचार र एजेण्डा मिल्ने पार्टीहरूसंग एकता र सहकार्यको पहल गर्ने, पार्टीले उठाउँदै आएका जनपक्षीय मुद्दाहरूलाई सम्बोधन गराउन सरकारसमक्ष निरन्तर पहल गर्ने, नयाँ सरकारलाई गुण र दोषको आधारमा समर्थन वा विरोध गर्ने, राष्ट्रियता जोगाउन, अर्थतन्त्र बचाउन र लोकतन्त्रलाई सुदृढ गर्दै सामाजिक न्याय स्थापित गर्न आजपाले उठाएका विचारलाई व्यापक रूपमा जनतासम्म पुर्याउने, जेनजी आन्दोलनका मुद्दाहरूलाई सम्बोधन गर्न÷गराउन पहल गर्ने निर्णय गरेको आजपा सचिवालय सदस्य सुभाष साहले जनाएका छन् ।

वर्तमान राजनीतिक अवस्थाको बारेमा छलफल गर्दै बैठकले देशमा आम निर्वाचन सम्पन्न भए पनि अन्यौलता कायमै रहेको, दुईतिहाईको जनादेशले देशमा स्थिरता, सुशासन र विकास तीव्र हुने जनपेक्षा देखिएपनि पुरानो राज्यसंरचना र नयाँ नेतृत्वबीचको विरोधाभाषपूर्ण सम्बन्धले अपेक्षित नतीजा दिन नसक्ने निष्कर्ष निकालेको छ ।

निर्वाचनबाट निर्वाचित नयाँ नेतृत्व एवं गठन हुने नयाँ सरकारले राष्ट्रिय सुरक्षा र अन्तराष्ट्रिय सम्बन्धलगायतका संवेदनशील विषयलाई कसरी अगाडि बढाउने भन्ने विषय सन्देहपूर्ण नै रहेको निष्कर्ष आजपाको छ ।

आम निर्वाचनपश्चात् राजनीतिक पार्टीहरूका विघटन, ध्रुवीकरण र पुर्नगठनको प्रक्रिया तीव्र भएको, विश्वमा बढ्दो राजनीतिक तनावबाट नेपालको राजनीतिक आर्थिक क्षेत्रमा पर्ने प्रभावले नयाँ समस्या उत्पन्न हुने निष्कर्ष बैठकको छ ।