प्रधानमन्त्री प्रचण्डले राजीनामा नदिए एमालेले आजै समर्थन फिर्ता लिँदै

काठमाडौं । सत्तासाझेदार ठूलो दल नेकपा (एमाले)ले प्रधानमन्त्री पुष्पकमल दाहाल ‘प्रचण्ड’ले राजीनामा दिएर मार्गप्रशस्त नगरे आफ्ना मन्त्रीहरूलाई फिर्ता बोलाउने भएको छ ।

एमालेले आज साँझसम्ममा मन्त्री फिर्ता बोलाउने निर्णय गर्ने पार्टीका प्रमुख सचेतक महेश बर्तौलाले बताएका छन् । उनले भनेका छन्, “प्रधानमन्त्रीले राजीनामा दिएर मार्गप्रशस्त नगरे हाम्रा मन्त्री फिर्ता गछौँ । आज साँझसम्म त्यो निर्णय हुन्छ,” ।

मंगलबार बसेको एमाले सचिवालय बैठकले प्रधानमन्त्री प्रचण्डलाई राजीनामा दिएर मार्गप्रशस्त गर्न आजसम्मको समय दिएको थियो । नेपाली कांग्रेससँग सत्तासाझेदारीको सहमति भएपछि एमालेले प्रधानमन्त्री प्रचण्डलाई राजीनामा दिन आग्रह गरेको हो ।

माओवादीका नेताहरू प्रधानमन्त्री विश्वासको मतको प्रक्रियामा जाने बताउँछन् । उता एमालेले मन्त्रीहरूको राजीनामासँगै सरकारलाई दिएको समर्थन फिर्ताको निर्णय गर्ने तयारी गरेको छ।