चितवन। मुग्लिङ–नारायणगढ सडकखण्ड सञ्चालनमा आएको छ । सडकखण्डअन्तर्गत चितवनको इच्छाकामना गाउँपालिकास्थित तुइन खोला पुलनजिकै पहिरो खस्दा दुई दिनअघिदेखि सडक अवरुद्ध भएको थियो ।

त्यहाँ खसेको पहिरो पूर्ण रूपमा हटाई बिहीबार राति साढे १० बजे देखि यातायात आवागमन दुईतर्फी सञ्चालन गरिएको सडक डिभिजन कार्यालय भरतपुरले जनाएको छ ।

ठूलो पहिरो गएपछि मंगलबार दिउँसोदेखि सो सडकखण्ड अवरुद्ध भएको थियो । सडकमा थुप्रिएको पहिरोको परिमाण १२ देखि १४ हजार घनमिटर रहेको अनुमान गरिएको थियो ।

साँझ फ्लडलाइट जडान गरेर पहिरो पन्छाइएको हो । सडक सञ्चालन भएसँगै अलपत्र परेर रोकिएका सयौँ सवारीसाधनहरू चलेका छन्।