श्रीलंकाको संसद विघटन, नोभेम्बर १४ मा निर्वाचनको घोषणा

काठमाडौँ/ ९ असाेज,  श्रीलंकाका राष्ट्रपति अनुरा कुमार दिसानायकेले संसद विघटन गर्नु भएको छ। राष्ट्रपति दिसानायकेले आगामी नोबेम्बर १४ मा आम निर्वाचन गर्ने गरी संसद विघटन गर्नुभएकाे हाे। श्रीलंकामा पछिल्लो संसद अधिवेसन अगस्ट २०२० मा बोलाइएको थियो । संसद विघटन निर्धारित समयभन्दा ११ महिना अगाडि भएको हाे । राष्ट्रपति चुनावको अभियानका क्रममा नै दिसानायकेले आफू विजयी भए तत्काल संसद विघटन गर्ने स्पष्ट पार्नुभएकाे थियाे । गत शनिबार भएको निर्वाचनको नतिजापछि राष्ट्रपति बन्नुभएका ५६ वर्षीय दिसायनाकेले संसद भंग गरेर निर्वाचनको मिति तोक्नु भएको हाे। श्रीलंकाको नवौं राष्ट्रपतिको रुपमा सपथ ग्रहण गरेपछि उहाँले आफू लोकतन्त्र जोगाउन र नेताहरुको सम्मान पुनर्स्थापनाका लागि सक्दो प्रयास गर्ने विश्वास दिलाउनुभएकाे थियाे । साथै उहाँले आफ्नो उद्देश्य देशलाई आर्थिक संकटबाट निकाल्ने भएको बताउनु भएको थियाे । उहाँले आफू जादुगर नभई आर्थिक संकटबाट गुज्रिरहेको देशलाई उकास्ने सामूहिक दायित्वमा लाग्ने आफ्नो लक्ष्य रहेको बताउनुभयाे । उहाँले भन्नु भएको थियोे, ‘म जादूगर होइन । म यो देशमा जन्मेको एक आम नागरिक हुँ । मसँग क्षमता र सक्षमता छ । मलाई केही कुरा थाहा छ र केही कुरा थाहा छैन । मेरो पहिलो काम भनेको जनताको प्रतिभालाई सदुपयोग गर्नु र यो देशको नेतृत्व गर्न राम्रो निर्णय गर्नु हो । सामुहिक जिम्मेवारीमा योगदानकर्ता बन्न चाहन्छु ।’