नगर प्रमुख तामाङद्वारा प्राकृतिक प्रकोपपछिको पुनर्निर्माणका लागि संघीय र प्रदेश सरकारको ध्यानाकर्षण

काठमाडौँ । मेलम्ची नगरपालिकाका नगर प्रमुख आइतमान तामाङले प्राकृतिक प्रकोपबाट क्षति पुगेको सार्वजनिक संरचनाहरुको पुनर्निर्माणका लागि संघीय र प्रदेश सरकारको गम्भीर ध्यानाकर्षण गराएका छन् ।

जिल्ला प्रशासन कार्यालय, जिल्ला विपद व्यवस्थापन समितिद्वारा आइतबार मेलम्चीमा आयोजित बहुप्रकोपमा आधारित पूर्व सूचना प्रणाली तथा विपद् जोखिम न्युनिकरण सम्बन्धि नीतिगत छलफल तथा आगामी योजनाका विषयमा अन्तरक्रिया कार्यक्रममा आफ्नो धारणा राख्दै नगर प्रमुख तामाङले संघ र प्रदेश सरकारको समन्वय र सहयोगको अभावमा मनसुन जन्य विपदबाट क्षति पुगेका सार्वजनिक तथा व्यक्तिगत संरचनाहरुको पुनर्निर्माणमा कठिनाई भएको बताएका हुन् ।

कार्यक्रममा पूर्व मन्त्री एवम माननीय सांसद मोहनबहादुर बस्नेत, माननीय सांसद माधव सापकोटा, बागमती प्रदेश सरकारका आन्तरिक मामिला तथा कानुन मन्त्री माननीय सुरज कृष्ण लामिछाने, पूर्व मन्त्री माननीय सांसद युवराज दुलाल, प्रदेश सांसदहरु माननीय कृष्ण कुमार तामाङ , माननीय सरल सहयात्री पौडेल, माननीय माइली लामा, माननीय कुमारी तामाङ , जिल्ला समन्वय समिति प्रमुख बालकृष्ण श्रेष्ठ , स्थानीय तहका प्रमुख र अध्यक्ष , उपप्रमुख र उपाध्यक्ष , सुरक्षा निकायका प्रमुखहरु एवम सरोकारवाला निकायका प्रतिनिधिहरुको सहभागिता थियो ।

सामुदायिक विकास तथा वातावरण संरक्षण मञ्चले सहजीकरण गरेको कार्यक्रम प्रमुख जिल्ला अधिकारी भुपेन्द्र थापाको सभापतित्वमा सम्पन्न भएको थियो ।