सार्वजनिक सवारीको नयाँ दर्ता अस्थायी रूपमा रोक

काठमाडौं । यातायात व्यवस्था विभाग ले सार्वजनिक सवारीसाधनको नयाँ दर्ता अस्थायी रूपमा रोक्न निर्देशन दिएको छ ।

सार्वजनिक यातायातको वैज्ञानिक व्यवस्थापन हुन नसक्दा बढ्दो वायु प्रदूषण, सवारी चाप तथा ट्राफिक जामका कारण आवागमनमा समस्या बढ्दै गएको भन्दै विभागले यस्तो निर्णय गरेको जनाएको छ ।

विभागका निर्देशक मणि राम भुसाल ले बुधबार सातै प्रदेश सरकारका सम्बन्धित मन्त्रालयलाई पत्राचार गर्दै सार्वजनिक यातायात क्षेत्रमा देखिएको असहजता व्यवस्थापन गर्न नयाँ दर्ता नियन्त्रण आवश्यक भएको उल्लेख गरेका छन् ।

सवारी तथा यातायात व्यवस्था ऐन, २०४९ को दफा १४ उपदफा (३) अनुसार वातावरण प्रदूषण, सवारी चाप, सडकको अवस्था वा सार्वजनिक हितसँग सम्बन्धित कारण देखिएमा सवारीसाधनको दर्ता रोक्न सकिने कानुनी व्यवस्था रहेको विभागले जनाएको छ ।

सोही व्यवस्था अनुसार अर्को सूचना जारी नभएसम्म सार्वजनिक सवारीसाधन, विद्युतीय सार्वजनिक सवारीसाधनसहित, को नयाँ दर्ता रोक्न प्रदेश तथा स्थानीय तहका निकायलाई निर्देशन दिइएको विभागले स्पष्ट पारेको छ ।

विभागले उक्त निर्देशन कोशी, मधेस, बागमती, गण्डकी, लुम्बिनी, कर्णाली र सुदूरपश्चिम प्रदेशका सम्बन्धित मन्त्रालय तथा सबै स्थानीय तहमा पठाएको जनाएको छ ।