सालीनदी किनारबाट हतियारसहित दुई पक्राउ, गोली प्रहारपछि एक घाइते

काठमाडौं । शंखरापुर नगरपालिका–५ सालीनदीस्थित खोला किनारबाट पेस्तोल, म्याग्जिन र गोलीसहित दुई जना पक्राउ परेका छन्।

पक्राउ पर्नेमा मकवानपुर बकैया गाउँपालिका–३ का ३५ वर्षीय राम भन्ने जीवन जिम्बा र सिन्धुपाल्चोक मेलम्ची नगरपालिका–१ का ३४ वर्षीय वीरबहादुर तामाङ रहेका छन्।

लागूऔषध कारोबार भइरहेको सूचनाका आधारमा लागूऔषध नियन्त्रण ब्यूरो, कोटेश्वरबाट खटिएको प्रहरी टोलीले उनीहरूलाई नियन्त्रणमा लिएको हो। पक्राउका क्रममा जीवन जिम्बाले प्रहरीमाथि गोली प्रहार गरेपछि प्रहरीले जवाफी फायर गर्दा उनी घाइते भएका छन्। हाल उनको सुस्मा कोइराला मेमोरियल अस्पताल, सलम्बुटारमा उपचार भइरहेको छ।

प्रहरीले घटनामा संलग्न अन्य दुई फरार व्यक्तिको खोजी गरिरहेको र यसबारे थप अनुसन्धान जारी रहेको जनाएको छ।