बङ्गलादेशकी पूर्व प्रधानमन्त्री हसिनालाई भ्रष्टाचारको अभियोगमा १० वर्षको जेल सजाय हुने फैसला

काठमाडौं । बंगलादेशकी पूर्वप्रधानमन्त्री शेख हसिनालाई जग्गा प्रकरणमा दोषी ठहर गर्दै त्यहाँको अदालतले १० वर्षको कैद सजाय सुनाएको छ । राजधानी ढाकास्थित पुर्बाचल न्यू टाउन सरकारी परियोजनाअन्तर्गत २० कठ्ठा जग्गा अनियमित रूपमा बाँडफाँट गरेको आरोपमा पूर्वप्रधानमन्त्री शेख हसिनालाई अदालतले कुल १० वर्षको जेल सजाय सुनाएको हो ।

ढाकाको विशेष न्यायाधीश अदालत-४ का न्यायाधीश रबिउल आलमले सोमबार हसिनालाई १० बर्ष जेलको फैसला सुनाएका हुन् । अदालतले दुवै मुद्दामा शेख हसिनालाई पाँच-पाँच वर्षको जेल सजाय सुनाएको छ ।

यी मुद्दाहरू राजधानी ढाका नजिकैको पूर्वाचोल क्षेत्रमा चलिरहेको राजुक नयाँ शहर परियोजनासँग सम्बन्धित छन् । त्यहाँ १० कट्ठाका दुई जग्गा अनुचित रूपमा बाँडफाँड गरिएको आरोप छ । अभियोजन पक्षका अनुसार, अभियुक्तहरूले आफ्नो पदको दुरुपयोग गरेर जग्गा बाँडफाँड प्रक्रियामा हेरफेर गरेका थिए । यो परियोजना राजधानी विकास प्राधिकरण (राजुक) अन्तर्गत पर्दछ ।

नोबेल शान्ति पुरस्कार विजेता मुहम्मद युनुसको नेतृत्वमा रहेको अन्तरिम सरकारले फेब्रुअरी १२ मा चुनावको तयारी गरिरहेको बेला यो फैसला आएको हो । हसिनाको पूर्व सत्तारूढ अवामी लिग पार्टीलाई चुनावमा भाग लिन प्रतिबन्ध लगाइएको छ ।

शक्तिको दुरुपयोग गरेको आरोपमा हसिना यसअघि परियोजनामा भएको भ्रष्टाचारका अन्य चार मामिलामा दोषी ठहरिनुभएको थियो । ती मामिलाहरूमा अदालतले उहाँलाई कुल २६ वर्षको जेल सजाय सुनाएको थियो भने उहाँका छोरा सजीब वाजेद र छोरी साइमा वाजेदलाई पाँच–पाँच वर्षको जेल सजाय सुनाइएको थियो ।

सबै अभियुक्तहरूलाई एक लाख टाका जरिवाना पनि तोकिएको छ । जरिवाना तिर्न नसकेमा थप छ महिना जेल सजाय हुनेछ । शेख हसिना हाल भारतमा बस्दै आएकी छिन् । उनलाई यसअघि आन्दोलनको क्रममा नरसंहार गरेको भन्दै मृत्युदण्डको सजाय समेत सुनाइसकिएको छ ।