सात महिनामा ८० अर्बको मालवस्तु आयात

काठमाडौँ । चालू आर्थिक वर्षको ७ महिनामा २९ वटा भन्सार नाका हुँदै ८ खर्ब ९७ अर्ब ९४ करोड ३८ लाख ९९ हजार रुपैयाँ बराबरको माल–वस्तु आयात भएका छन् । यीमध्ये १७ वटा भन्सार विन्दुबाट नेपालको तर्फबाट ८६ अर्ब ८३ करोड ९ लाख १२ हजार रुपैयाँ बराबरको माल–वस्तु निर्यात हुँदै गर्दा एक दर्जन ९१२ वटा० भन्सार निर्यात शून्य हुन पुगेका छन् ।
भद्रपुर, चोभार, गौतमबुद्ध अन्तर्राष्ट्रिय विमानस्थल, जनकपुर भन्सार कार्यालय, महेशपुर भन्सार कार्यालय, पोखरा अन्तर्राष्ट्रिय विमानस्थल, राजविराज भन्सार कार्यालय, सिरहा भन्सार कार्यालय, सुनसरी भन्सार कार्यालय, सुथौली भन्सार कार्यालय, थाडी भन्सार कार्यालय र त्रिवेणी भन्सार कार्यालयबाट निर्यात शून्य भएका हुन् ।
यस्तै, आयाततर्फ यी १२ वटा भन्सार नाकाहरुको केही न केही योगदान रहेको छ ।
उत्तरतर्फका दुई मुख्य नाका तातोपानी भन्सार कार्यालयबाट समीक्षा अवधिमा १९ अर्ब ८४ करोड ५९ लाख रुपैयाँ बराबरको मालवस्तु आयात हुँदा रसुवागढी, केरुङ भन्सार हुँदै ३२ अर्ब ५६ करोड ४९ लाख रुपैयाँ बराबरको माल–वस्तु आयात भएको छ ।
यी दुई भन्सारबाट ७ महिनामा क्रमशः ४० लाख ३५ हजार रुपैयाँ र १ अर्ब २७ करोड १४ लाख १७ हजार रुपैयाँ बराबरको माल–वस्तु चीनतर्फ निर्यात भएका छन् ।
समीक्ष अवधिमा त्रिभुवन अन्तर्राष्ट्रिय विमानस्थलबाट मात्र ८० अर्ब ३९ करोड ५६ लाख ७१ हजार रुपैयाँ बराबरको माल–वस्तु आयात भएको भन्सार विभागले जनाएको छ । मुलुकमा हाल तीनवटा अन्तर्राष्ट्रिय विमानस्थल भए पनि अन्तर्राष्ट्रिय उडानमा हालसम्म टीआईए मात्र नियमित भएकाले सोही विमानस्थलबाट यात्रुसहित वैदेशिक आयातनिर्यात भइरहेको छ ।
यस्तै, समीक्ष अवधिमा त्रिभुवन अन्तर्राष्ट्रिय भन्सार कार्यालयमार्फत २० अर्ब १३ करोड ६८ लाख ४७ हजार रुपैयाँ बराबरको मालवस्तु निर्यात भएको समेत विभागले जनाएको छ । कुल आयातको तुलनामा त्रिभुवन अन्तर्राष्ट्रिय विमानस्थलको हिस्सा ८.९५ प्रतिशत रहेको छ भने निर्यातमा २३.१९ प्रतिशत रहेको छ ।
समीक्ष अवधिमा सबैभन्दा बढी वीरगन्ज भन्सार कार्यालयबाट ३ खर्ब ५ अर्ब ३२ करोड ४२ लाख रुपैयाँ बराबरको माल–वस्तु आयात भएको छ भने सोही भन्सार कार्यालय हुँदै १६ अर्ब ७६ करोड ३९ लाख रुपैयाँ बराबरको वस्तु निर्यात भएको छ ।
यस्तै, विराटनगर भन्सार कार्यालयबाट ९७ अर्ब ४९ करोड ७३ लाख रुपैयाँ बराबरको मालवस्तु आयात हुँदै १७ अर्ब ८६ करोड ६५ लाख रुपैयाँको निर्यात भएको छ ।
भैरहवा भन्सार कार्यालयबाट १ खर्ब ३७ अर्ब ६८ करोड ६३ लाख रुपैयाँ बराबरको माल–वस्तु आयात हुँदै गर्दा उता ७ अर्ब ७३ करोड ८५ लाख रुपैयाँ बराबरको माल–वस्तु निर्यात भएको छ ।