विस्थापितहरुकाे पुनर्वासका लागि छिट्टै सरकारले व्यवस्था गर्छ – गृहमन्त्री लेखक

ललितपुर/२३ असोज : गृहमन्त्री रमेश लेखकले विस्थापितहरुकाे पुनर्वासका लागि छिट्टै सरकारले व्यवस्था गर्ने बताउनुभएको छ । मंगलबार ललितपुरको महाङ्काल गाउँपालिकाकाे गाेटिखेलमा बाढिपहिराे क्षेत्रकाे निरीक्षण गर्नुहुँदै विपद्को पीडालाई सम्बोधन गर्न सरकार लागि परेको बताउँदै उहाँले जतिसक्दो चाँडो यो समस्याबाट पार पाउन सबै एकजुट हुनुपर्नेमा जोड दिनुभयो ।
” पुनःनिर्माण र पुनःस्थापनाकाे लागि सरकारले छिट्टै व्यवस्था गर्छ, यो समस्यामा कहाँ जाउँला? के गरुँला? यो नसोच्नुहोला । सरकार छ, सरकार भनेको सबैको अभिभावक पनि हो ।” उहाँले भन्नुभयो ।
उहाँले सरकार अत्यन्तै संवेदनशील भएर पुनःनिर्माणमा लाग्ने बताउनुभयाे ।
“यसमा कुनै राजनीति छैन, कुनै पक्ष विपक्ष छैन्, तीन वटै सरकार, सबै राजनीतिक दल, गैरसरकारी संस्था सबै मिलेर हामीले यो विपद्पछिको समस्या समाधान गर्नु छ ।” गृहमन्त्री लेखकले भन्नुभयो ।
मन्त्री लेखकले पालिकाहरुलाई तत्काल लाभग्राही विवरण पठाउन आग्रह समेत गर्नुभयो ।
“लाभग्राहीको विवरण आएको तीन दिनभित्र तत्काल राहतका लागि रु १५ देखि २० हजार र अस्थायी आवास निर्माणमा पहिलो किस्ता स्वरुप २५ हजार दिन्छौं ।” उहाँले भन्नुभयो।
त्यस्तै, रक्षामन्त्री मानबीर राईले विपदबाट सृजित समस्या हल गर्नका लागि मिलेर काम गर्दा छिट्टै समस्या समाधान गर्न सकिने बताउनुभयाे ।

स्थलगत निरीक्षणका क्रममा ललितपुर क्षेत्र नं. १ का संघीय सांसद उदयशम्शेर राणा, जिल्ला समन्वय समिति ललितपुरका प्रमुख ऋषिदेव फूँयाल, महाँकाल गाउँपालिकाका अध्यक्ष गणेशबहादुर केसी, उपाध्यक्ष डाेल्मामायाँ गाेलेलगायतले यहाँकाे प्रभावित क्षेत्र, भएको क्षति र पुनःनिर्माण र पुनःस्थापनाकाे आवश्यकताका बारेमा जानकारी गराउनु भएको थियोे ।

स्थलगत निरीक्षणका क्रममा आज सिन्धुली, सिन्धुपाल्चोक र ललितपुरको बढि प्रभावित ग्रामीण क्षेत्रमा गृहमन्त्री लेखकसंगै भौतिक पूर्वाधार तथा यातायात मन्त्री देवेन्द्र दाहाल, रक्षामन्त्री मानवीर राइ र प्रधानसेनापति अशोकराज सिग्देल सहितको टोली बाढी/पहिरो प्रभावित क्षेत्रको अनुगमन गरेको हाे । यसअघि गृहमन्त्री लेखकले आइतबार र साेमबार काभ्रेपलाञ्चोक र ललितपुरको गोदावरी क्षेत्रको प्रभावित स्थल अनुगमन गर्नुभएको थियो ।