बौद्ध विद्वानहरूलाई लुम्बिनीमा भ्रमण गर्न आग्रह

नयाँ दिल्ली/ २२ कात्तिक, लुम्बिनी विकास कोषका उपाध्यक्ष डा.ल्हारक्याल लामा (खेन्पो छिमे छिरिङ)ले बौद्ध विद्वानहरूलाई भगवान बुद्धको जन्मस्थल लुम्बिनीमा भ्रमण गर्न आग्रह गर्नुभएकाे छ।
भारत सरकारको आयोजनामा नयाँ दिल्लीमा भएको प्रथम एसियन बुद्धिस्ट समिट २०२४ लाई सम्बोधन गर्दै डा.लामाले बुद्ध जन्मस्थल लुम्बिनीमा स्वागत गर्न आफूहरू सधैँ तयार रहेको बताउनुभयो ।
पूर्वसांसद समेत रहनुभएका उपाध्यक्ष डा.लामाले एसियन बुद्धिस्ट समिट जस्ता कार्यक्रमहरूले बुद्धका चार आर्य सत्य संसारभर फैलाउन र बौद्ध परम्परागतहरूको बारेमा छलफल गर्न महत्वपूर्ण भूमिका निर्वाह गर्ने बताउनुभयो ।
डा.लामाले बौद्ध शिक्षाको माध्यमबाट एसियालाई विकसित बनाउन सकिने बताउनुभयो । बुद्ध मार्गले कला, साहित्य, बस्तुकला र ध्यानको माध्यमबाट सम्पूर्ण एसियालाई जोडेको उहाँले बताउनुभएकाे छ ।

एसियाली मूलुकहरूमा बुद्ध धर्म र बौद्ध शिक्षाको विभिन्न तरिकाले अनुशरण भइरहेको बताउँदै उपाध्यक्ष डा.लामाले एक चक्रवती राजाले धम्म शिक्षाको माध्यमबाट संसारभरि राज गरेको स्मरण गर्नुभएकाे छ ।

उहाँले बुद्ध धर्म र बौद्ध शिक्षालाई विशेष महत्व दिएर कार्यक्रमको आयोजना गरेको भन्दै भारत सरकारलाई धन्यवाद ज्ञापन समेत गर्नुभएकाे छ ।