पार्टी फुटाउनेलाई एमालेमा प्रवेश नदिने ओलीको भनाइ

काठमाडौँ । नेकपा एमालेका अध्यक्ष केपी शर्मा ओलीले एकीकृत समाजवादीसँग पार्टी एकता नहुने प्रस्ट पारेका छन् ।

बिहीबार पार्टी कार्यालय च्यासलमा विभिन्न पार्टी परित्याग गरी आएका नेता–कार्यकर्ताहरूलाई एमालेमा प्रवेश गराउँदै अध्यक्ष ओलीले माधव नेपाल लक्षित गर्दै पार्टी फोडेकोमा पश्चाताप नगर्ने, दुई तिहाइको सरकार ढालेर दक्षिणपन्थी सरकार बनाएकोमा पश्चताप नगर्नेलाई एमालेमा प्रवेश नगराउनेसमेत बताएका छन् ।

अध्यक्ष ओलीले भने, ‘कुनै हिसाबले कुनै समयमा गल्ती भयो भने त्यसमा महसुस गरेर अघि बढ्ने हो । कतिपय तत्वहरूसँग हाम्रो एकता हुँदैन र उनीहरूले प्रवेश पाउँदैनन् । किनभने उनीहरूलाई दुई तिहाइको पार्टी फोडेकोमा, पार्टी कमजोर बनाएकोमा, दुई तिहाइको सरकार ढालेर दक्षिणपन्थी सरकार बनाएकोमा कुनै पश्चताप छैन, गल्ती भयो भन्नेसम्म पनि छैन, त्यस्ता मानिसलाई पार्टीमा प्रवेश हुँदैन । गल्ती महसुस गर्नेलाई पार्टीमा प्रवेश हुन्छ । अहिले पार्टी प्रवेशको लहर अत्यन्तै गतिका साथ, तिब्रताका साथ रहेको छ ।’

प्रभु साह नेतृत्वको आम जनता पार्टीका उपमहासचिव एवं पूर्वप्रदेश सांसद कुन्दन कुशवाहा, केन्द्रीय सदस्य अरविन्दकुमार यादव, सञ्जयकुमार शाह, सरफलाल महतो, दीपककुमार दुवे, सुरेन्द्रप्रसाद चौधरीलगायत व्यक्तिहरु एमालेमा प्रवेश गरेका छन् ।