धौलागिरि क्षेत्रमा ब्रह्माण्डीय महायज्ञ

गलकोट । राष्ट्रपति रामचन्द्र पौडेलले धौलागिरि क्षेत्र पवित्र तपोभूमि रहेको बताएका छन् ।
पवित्र शालिग्राम पाइने कालीगण्डकी नदी, मुक्ति क्षेत्र, पञ्चकोट, गलेश्वरधाम र कालिका मन्दिरले धौलागिरि क्षेत्र एक पवित्र धार्मिक तपोभूमि रहेको उनले बताएका हुन् ।
बागलुङ नगरपालिका–६ सर्वसिद्धिधाम पञ्चकोटमा भइरहेको अनन्तश्री ब्रह्माण्डीय महायज्ञमा धारणा राख्दै राष्ट्रपति पौडेलले धौलागिरि क्षेत्रमा पछिल्लो समय पञ्चकोटको महत्व र महिमा बढेको बताए । उनले पाँचकोटको सङ्गमस्थलमा स्वामी कमलनयनाचार्यको सत्कङ्कल्पमा यी बृहत् संरचना निर्माण भएको देखेर आफूलाई खुसी लागेको पनि राष्ट्रपतिले बताए ।
‘धौलागिरि क्षेत्र आफैंमा तपोभूमि हो, मुक्तिक्षेत्र, दामोदर कुण्ड, गलेश्वर धामसँगै अहिले पञ्चकोटको नाम आइरहेको छ, म पहिला शालिग्राम सङ्ग्रहालय आएको थिएँ, नदी र जल सम्पदाको संरक्षणमा यो महायज्ञ आयोजना भएको मैले पाएँ’ राष्ट्रपति पौडेलले भने, ‘कुडुलेमा सवा लाख शालिग्राम दर्शन गरेको थिएँ, अहिले यो पवित्र भूमि पञ्चकोट आउँदा आफूलाई खुसी लागेको छ, महायज्ञले धार्मिक प्रसार मात्रै गरेको छैन, जलसम्पदा, सङ्कटमा रहेको शालिग्रामलाई जोगाउन थालेको छ ।’

संस्कृत, परम्परा, मूल्य र मान्यताले नेपालीलाई एकताबद्ध बनाएको भन्दै राष्ट्रपति पौडेलले नेपालका नदीहरु पवित्र रहेको पनि बताएका छन् ।