कांग्रेस र एमाले मिलेर सरकार बनाउँदा लोकतन्त्र कमजोर बन्न सक्छः डा. शशांक कोइराला

विराटनगर । नेपाली कांग्रेसका केन्द्रीय सदस्य डा. शशांक कोइरालाले सरकार गठनकै लागि दुई ठूला दल एकापसमा मिल्दा मुलुक एकतन्त्रीय शासनतर्फ उन्मुख हुन सक्ने खतरा बढ्ने बताएका छन् । कोइरालाले नेपाल प्रेस युनियन सुनसरी शाखाले इटहरीमा आयोजना गरेको पत्रकारसँगको अन्तक्र्रिया कार्यक्रममा बोल्दै यस्तो बताएका हुन् ।

कार्यक्रममा कोइरालाले भने, “लोकतन्त्रको सुन्दर पक्ष भनेको बलियो विपक्षी हो । तर, दुई ठूला दल कांग्रेस र एमाले मिलेर सरकार बनाउँदा लोकतन्त्र कमजोर बन्न सक्छ,” । कोइरालाको प्रतिप्रश्न गरे, ‘सत्ताको कमजोरीमा प्रश्न उठाउन नसक्ने प्रतिपक्ष भएमा कसरी लोकतन्त्र बलियो हुन्छ ?’ ।

कांग्रेसकै कारण कम्युनिष्ट स्थापित भएको दाबी गर्दै कोइरालाले नेपालमा कम्युनिस्टसँग मिल्नु हुन्न भन्ने पक्षमा आफ्नो मान्यता रहेको स्पष्ट पारे । उनको भनाइ छ, “चुनाव हार्नासाथ उनीहरूसँग मिल्नुपर्ने केही कारण छैन,” । संघीयता कार्यान्वयनमा देखिएको समस्या समाधान गर्न विकेन्द्रीकरणलाई पूर्ण रूपमा लागु गर्नुपर्नेमा कोइरालाको सुझाव छ ।

राजनीतिक दलहरूले समेत आन्तरिक रूपमा विकेन्द्रीकरण अनुशरण गर्दै कार्यान्वयनमा जानुपर्ने कोइरालाले बताएका छन् । उनी भन्छन्, “पार्टीको आन्तरिक लोकतन्त्र विकेन्द्रीकरणबाटै थप सुदृढ हुन्छ ।”