कांग्रेस प्रदेश सभापतिमा सिताको उम्मेदवारी घोषणा

सिन्धुली, १० असोज, नेपाली कांग्रेसको १५औँ महाधिवेशनअन्तर्गत सिन्धुली क्षेत्र नं. २ (प्रदेश ‘ख’) को सभापति पदमा सिता स्याङतानले उम्मेदवारी घोषणा गरेकी छन्। उक्त पदमा यसअघि महिलाको उम्मेदवारी दाबी नरहेको स्याङतानको भनाइ छ।
क्षेत्र नं. २ (प्रदेश ‘ख’) अन्तर्गत मरिण, हरिहरपुरगढी र ध्याङलेख गाउँपालिका पर्छन्। यी स्थानीय तहबाट चयन भएका प्रतिनिधिले प्रदेश सभापति चयनका लागि मतदान गर्नेछन्। निर्वाचन कार्यतालिकाअनुसार असोज १२ गते उम्मेदवारी दर्ता र असोज १३ गते निर्वाचन हुने कार्यक्रम छ।
उम्मेदवारी घोषणा गर्दै स्याङतानले यसअघि उक्त पदमा महिलाको दाबी नरहेकाले आफूले यसपटक उम्मेदवारी दिएको बताइन्। उनले प्रतिनिधिहरूबाट आफ्नो उम्मेदवारीलाई समर्थन प्राप्त हुने अपेक्षा व्यक्त गरिन्।
“सभापति पदमा अहिलेसम्म कुनै महिलाले दाबी गर्नुभएको थिएन। यसपटक मैले दाबी गरेकी छु,” उनले भनिन्।
स्याङतानले पार्टीको नेतृत्वमा महिलाको सहभागिता बढाउने उद्देश्यले आफूले उम्मेदवारी दिएको बताइन्। उनका अनुसार उनले विभिन्न सामाजिक तथा राजनीतिक संस्थामा जिम्मेवारी सम्हाल्दै आएकी छन्।
उनी सामुदायिक विद्यालय व्यवस्थापन समिति महासंघकी केन्द्रीय उपाध्यक्ष, नेपाल आदिवासी जनजाति महासंघकी जिल्ला उपाध्यक्ष, नेपाल महिला संघकी जिल्ला सचिव तथा नेपाली कांग्रेस बागमती प्रदेश प्रतिनिधिका रूपमा काम गरिसकेकी छन्।
पार्टीले अघि सारेका लोकतन्त्र, राष्ट्रियता,उ समाजवाद र जनउत्तरदायी शासनका आधारलाई आत्मसात गर्दै संगठनलाई समयअनुकूल बनाउने विषय आफ्नो प्राथमिकतामा रहेको स्याङतानले बताइन्।