२४ घण्टामा काठमाडौंमा २,४०८ चालक कारबाहीमा

काठमाडौँ । काठमाडौँ उपत्यकामा पछिल्लो २४ घण्टामा सवारी नियम उल्लङ्घन गर्ने दुई हजार ४०८ जना सवारी चालक ट्राफिक कारबाहीमा परेका छन्। कारबाहीबाट राज्यकोषमा चार लाख ५८ हजार रुपैयाँ राजस्व संकलन भएको छ।

काठमाडौँ उपत्यका ट्राफिक प्रहरी कार्यालयका अनुसार मादक पदार्थ सेवन गरेर सवारी चलाउने १४० जना चालकलाई कारबाही गरिएको छ। त्यसैगरी, नियमविपरीत ‘राइड सेयरिङ’ गर्ने ११६ जना, ट्राफिक सङ्केत बत्ती उल्लङ्घन गर्ने १३८ जना तथा तीव्र गतिमा सवारी चलाउने २८४ जना चालक कारबाहीमा परेका छन्।

यस्तै, लेन अनुशासन पालना नगर्ने ८५ जना, निषेधित क्षेत्रमा हर्न बजाउने १०६ जना, सडक पेटीमा सवारीसाधन पार्किङ गर्ने १२४ जना र एकतर्फी सडकमा सवारी चलाउने ११६ जना चालकलाई पनि ट्राफिक प्रहरीले कारबाही गरेको जनाएको छ।

यसका अतिरिक्त अन्य विभिन्न सवारी नियम उल्लङ्घन गर्ने एक हजार ३३५ जना चालकलाई समेत कारबाही गरिएको ट्राफिक प्रहरीले जनाएको छ। ट्राफिक नियमको प्रभावकारी कार्यान्वयन र सडक सुरक्षालाई सुदृढ बनाउन नियमित निगरानी तथा कारबाही अभियान जारी रहने कार्यालयले उल्लेख गरेको छ।