४० देखि ५० बर्षकाे लागि उपयुक्त शिक्षा नीति तय गर्ने बहस् आवश्यक – सभापति देउवा

ललितपुर/ २० मङ्सिर: पूर्वप्रधानमन्त्री एवम् नेपाली कांग्रेसका सभापति शेरबहादुर देउवाले ४० देखि ५० बर्षकाे लागि प्रभावकारी हुने शिक्षा नीति तय गर्न सफलता मिल्ने बहस हाेस् भन्ने धारणा राख्नुभएको छ ।
नेपाली कांग्रेस केन्द्रीय शिक्षा विभागद्वारा बुधबार यहाँ आयाेजित ‘शिक्षा नीति बहस’ बिषयक कार्यक्रममा मन्तव्य राख्नुहुँदै सभापति देउवाले शिक्षा र स्वास्थ्य पहिलाे आवश्यकता भएको भन्दै  नेपाललाई उच्च शिक्षाकाे गन्तव्य बनाउनेमा ध्यान दिनुपर्ने बताउनुभएको हाे ।
“शिक्षा प्रणालीकाे गुणात्मक विकासदेखि विश्व विद्यालय तहसम्मकाे शिक्षालाई समयसापेक्ष र विश्वस्तरीय उत्कृष्ट बनाइनु आवश्यक छ, सबै तह र क्षेत्रका उत्कृष्ट शिक्षा नीति तय गर्न याे बहस महत्त्वपूर्ण हुनेछ।” सभापति देउवाले भन्नुभयो ।
उहाँले कांग्रेसले मुलुककाे शिक्षा प्रणालीको विकासलाई उच्चप्राथमिकतामा राखेकाे बताउनुहुँदै शिक्षा ऐन ल्याउने विषय चर्चामा रहेकोले यसकालागि पार्टीले पहलकदम लिनेछ भन्नुभयो।
“क्याम्पसहरुमा विद्यार्थी अभावमा बन्द हुने अवस्थाकाे समस्या समाधानका लागि बहस उपयाेगी हुनेछ, बहसबाट आएका निष्कर्ष कार्यान्वयनमा पार्टीले ध्यान दिनेछ, दक्ष र शिक्षित जनशक्तिलाई स्वदेशमै रहने वातावरण बनाउन शिक्षालाई सीप संग जाेड्नु पर्नेछ, यस्ता बहसले समग्र मुलुककाे शिक्षा नीतिमा सकरात्मक प्रभाव पार्नेछ भन्ने विश्वास छ।” सभापति देउवाले भन्नुभयो ।
नागरिकमा उच्च संस्कार र सुसस्कारयुक्त शिक्षा दिन सक्ने नीति तय गर्न बहसबाट सफलता मिलाेस् भन्नुहुँदै उहाँले बहसमम ब्यक्त हुने बाैद्धिक व्ययक्तित्वहरुकाे धारणाकाे उच्चतम उपयाेग हुनेछ भन्ने धारणा राख्नुभयाे ।
पार्टीका शिक्षा विभाग प्रमुख तथा केन्द्रीय सदस्य नैनसिंह महरकाे नेतृत्वमा भएको कार्यक्रममा विभिन्न व्यक्तित्व र बिषयविज्ञहरुले धारणा राख्ने र प्रस्तुतिकरण गर्नुभएकाे थियो।