१३औं कोरियन एम्बासडर तेक्वान्दो कप सोमबारबाट सुरु

हरिशरण तिमिल्सिना

काठमाडौँ । गणतन्त्र कोरियाली दूतावास र नेपाल तेक्वान्दो संघको संयुक्त आयोजनामा ललितपुरको सादोबाटो स्थित तेक्वान्डो एसोसिएसनको भवनमा १३औं कोरियन एम्बासडर तेक्वान्दो च्याम्पियनसिप सोमबारदेखि शुरू भएको छ। पाँच दिनसम्म चल्ने यो अन्तर्राष्ट्रिय स्तरको प्रतियोगिता नेपालस्थित दक्षिण कोरियाली दूतावासको आर्थिक सहयोग र नेपाल तेक्वान्दो संघको व्यवस्थापनमा सम्पन्न हुँदैछ।

प्रतियोगिताको उद्घाटन नेपाल खेलकुद परिषद् (राखेप) का अधिकारी तथा नेपालस्थित कोरियाली राजदूत पार्क थे यङले संयुक्त रूपमा गरे। प्रतियोगितामा क्योरोगी र पुम्से गरी कुल १०३ स्वर्ण पदकका लागि करिब १५ सय खेलाडी प्रतिस्पर्धामा उत्रिएका छन्।

उद्घाटन समारोहलाई सम्बोधन गर्दै राजदूत पार्कले तेक्वान्दोलाई कोरियाली सांस्कृतिक पहिचानको महत्वपूर्ण हिस्सा र अनुशासन, सम्मान तथा धैर्यका मूल मूल्यले विश्वभरका खेलाडीलाई जोड्ने माध्यम भएको बताए। खेलकुदले नेपाल–कोरिया मित्रतामा थप गहिरो विश्वास पैदा गरेको उल्लेख गर्दै उनले नेपालले तेक्वान्दोमा प्राप्त गरिरहेको अन्तर्राष्ट्रिय सफलताको प्रशंसा गरे।

राजदूत पार्कले पेरिस २०२४ पारालिम्पिकमा पलेशा गोवर्धनले ऐतिहासिक कास्य पदक जितेको क्षण ‘दुई देशबीचको खेलकुद सहकार्यको गर्विलो उपलब्धि’ भएको उल्लेख गरे।

त्यस्तै, उद्घाटन समारोहमा बोल्दै निवर्तमान युवा तथा खेलकुद मन्त्री बिराज भक्त श्रेष्ठले नेपाल र कोरिया बीचको सुमधुर सम्बन्धलाई स्मरण गर्दै तेक्वान्दो मार्फत दुई देशबीचको सहयोगात्मक साझेदारी अझ सुदृढ भइरहेको बताए।

यो संस्करणको एम्बासडर कपलाई अझ अन्तर्राष्ट्रिय रंग दिने उद्देश्यसहित भारत, पाकिस्तान, बंगलादेश र भुटानका खेलाडीहरूको सहभागिता रहेको आयोजकले जनाएको छ। चार छिमेकी मुलुकको सहभागिताले एम्बासडर कपलाई बहु-देशीय प्रतिस्पर्धात्मक मञ्चका रूपमा विस्तार गर्न मद्दत गरेको आयोजकको भनाइ छ।

पाँचदिने प्रतियोगिताले नेपालमा तेक्वान्दोको लोकप्रियता, अन्तर्राष्ट्रिय पहुँच र खेलकुद कुटनीतिक सम्बन्ध दुवैलाई थप मजबुत बनाउने अपेक्षा गरिएको छ।