सोलुखुम्बुमा बाढी : १४ घर बगायो, सतर्कता अपनाउन आग्रह

सोलुखुम्बु । सोलुखुम्बुको खुम्बु पासाङल्हामू गाउँपालिका ५ को थामे क्षेत्रमा लेदोसहित आएको भीषण बाढीले १४ घर बगाएको छ । थामे क्षेत्रमा हिमताल फुटेर आएको लेदोसहितको बाढीले १४ घर बगाएको हो ।

आज दिउँसो २ बजे बाढी आएको थियो । बाढीबाट एउटा विद्यालय, ३ वटा क्लिनिकसहित १४ वटा घरमा पूर्ण क्षति भएको हो । अहिलेसम्म मानवीय क्षतिको विवरण भने आएको छैन ।

यस्तै बाढीले ७ वटा घर उच्च जोखिममा रहेको सोलुखुम्बुको प्रमुख जिल्ला अधिकारी देवी पाण्डे खत्रीले जानकारी दिइन् ।

जल तथा मौसम विज्ञान विभागले पनि दूधकोशी नदी आसपासमा जोखिम बढेको भन्दै उच्च सतर्कता अपनाउन आग्रह गरेको छ । जिल्ला प्रशासन कार्यालय सोलुखुम्‍बुले सूचना जारी गरेर सुरक्षित स्थानमा जान भनेको छ ।