सिन्धुपाल्चोकका माझी समुदायले धुमधामका साथ मनाए लदि पुजा

काठमाडौं/२१ फागुन,सिन्धुपाल्चोकका माझी समुदायले हरेक वर्ष फागुन महिनाको तेस्रो मङ्गलबार लदि पुजा अर्थात पानीलाई पुजा गरेका छन् ।

सिन्धुपाल्चोकमा माझी समुदायको बाहुल्यता रहेको इन्द्रावती-११ स्थित बोर्डगाउँको ईन्द्रावती बगरमा उलेख्य माझी समुदायको उपस्थितिमा साँस्कृतिक कार्यक्रम सहित लदि पुजा कार्यक्रमको उदघाटन सिन्धुपाल्चोक क्षेत्र नम्बर २ का संघीय सांसद एवम पूर्व मन्त्री मोहनबहादुर बस्नेतले गरेका हुन्  ।

कार्यक्रमको उदघाटन गर्दै सांसद बस्नेतले माझी समुदायले मनाउने कोशी पुजा परिमार्जित रुपमा अझ सशक्त हुँदै गएको बताउँदै यो पर्वले समाजिक सन्देश प्रभाव गर्ने बताए । सोही कार्यक्रममा नेता बस्नेतले माझी समुदायले मनाउने लदि पुजाको अध्यक्षकोष निर्माणको लागि आफूले ५१ हजार व्यक्तिगत रुपमा राखिदिने उदघोष गरे ।

कार्यक्रमका विशेष अतिथि ईन्द्रावती गाउँपालिका अध्यक्ष झम्कनाथ नेपालले गाउँपालिकाले विभिन्न जातजातिहरुको साँस्कृतिक पर्वहरुलाई जगर्ना गर्न विविध कार्यक्रम गर्ने गरी योजना बनाएको बताए । अन्य आदिबासी जनजाति भन्दा माझी समुदाय सिमान्तकृत समुदाय भएको हुनाले विशेष प्राथमिकतामा राखिने उदघोष गरे ।

कार्यक्रममा ईन्द्रावती गाउँपालिका अधिकांश वडाअध्यक्षहरुले लदि पुजाको अवसरमा शुभकामना दिएका दिए । त्यस्तै माझी समुदायका नेताहरुले राज्यले माझी समुदायलाई हरेक कुरामा विभेद गरेको भन्दै आक्रोस पोखे । नेपालमा अन्य समुदाय केन्द्रीत चाडपर्वहरुमा विदा दिने गरेपनि माझी समुदायलाई राज्यले कुनै विदा नदिएको बताए ।

लदीपूजालाई कोसीपूजा भनेर पनि चिनिन्छ । माझी भाषामा नदीलाई ‘लदि’ भनिन्छ । माझी समुदायको सबैभन्दा ठुलो पर्वका रूपमा लदीपूजालाई लिइन्छ । माझी समुदायले नदीलाई मामा र माझिलाई भाञ्जाको नातासम्बन्धको रुपमा लिने चलन छ । त्यसैले पनि उक्त समुदायमा यो पर्वको विशेष महत्व रहेको वडा नै ११ का वडाध्यक्ष राम्जी माझीले बताए ।