सामुदायिक योग समूह गाईजात्रा (इन्द्रजात्रा) विशेष कार्यक्रम मनाइयो

रामचन्द्र दुलाल
काठमाडौँ, असोज ९ । इन्द्रजात्रा पर्वको अवसरमा सामुदायिक सेवा समाजअन्तर्गत रहेको सामुदायिक योग समूहले शुक्रबार गाईजात्रा (इन्द्रजात्रा) विशेष कार्यक्रम सम्पन्न गरेको छ ।
काठमाडौँ महानगरपालिका वडा नं. ७ कुमारीगाल–मैजुबहालस्थित सामुदायिक भवनको योग हलमा आयोजित एक कार्यक्रमबिच उक्त विशेष कार्यक्रम सम्पन्न गरिएको हो ।

गाईजात्रा विशेष कार्यक्रममा योग समूहमा आबद्ध करिब ५० जना व्यक्तिले हाँस्यव्यङ्ग, प्रर्दशन, अभिनय, गीत, कविता तथा चुट्किला र जीवनउपयोगी अनुभूतिहरू समेत प्रस्तुत गरिएको थियो ।
प्रतियोगितात्मक प्रस्तुतीका निर्णायक समूहमा नारायणी नेपाल, मधुसूदन ढुङ्गेल र डम्बरुबल्लभ घिमिरे रहनुभएको थियो । प्रतियोगितामा विष्णु पौडेल(प्रथम), शोभना क्षेत्री(द्वितीय), पार्वती उपाध्याय (तृतीय) र कल्पना पनेरु र रेणु गिरीले (सान्त्वना) पुरस्कार प्राप्त गर्नुभएको थियो ।
सहभागिहरूको प्रस्तुती समसामयिक र यथार्थपरक रहेको धारणा राख्दै सामुदायिक योग समूहकी प्रमुख प्रशिक्षक सुनिता शर्मा अर्यालले सबैलाई धन्यवाद ज्ञापन गर्नुभयो ।

सामुदायिक योग समूहले विगत अढाइ वर्षदेखि बिहान ५ः०० बजेदेखि ६ः३० बजेसम्म निरन्तररुपमा योगाभ्यास सञ्चालन गरिरहेको छ । यसको अतिरिक्त समूहको पहलमा सामाजिक पर्व तथा व्यक्तित्व विकाससम्बन्धी कार्यक्रमहरू समेत सञ्चालन गर्दै आएको जानकारी सामुदायिक सेवा समाजका कोषाध्यक्ष विष्णुप्रसाद तिमल्सिनाले दिनुभयो ।