समुदायले गर्ने काममा सरकारकाे हस्तक्षेपलाई कम हुने गरि मिलेर काम गर्नुपर्छ – महामन्त्री थापा

ललितपुर/१५ भदौ, नेपाली कांग्रेसका महामन्त्री तथा पूर्वस्वास्थ्यमन्त्री गगनकुमार थापाले नेपाली कांग्रेसका महामन्त्री गगनकुमार थापाले समुदायले गर्ने काममा सरकारकाे हस्तक्षेपलाई कम हुने गरि मिलेर काम गर्नुपर्छ भन्नुभएको छ ।१७ ओै पुस्तकालय दिवस एवम् १५९ ओैं माेती जयन्तीको अवसरमा गाेदावरी सामुदायिक पुस्तकालय स्राेत केन्द्रद्वारा आज शनिबार यहाँ आयाेजित मुखपत्र लाेकार्पण, साहित्यिक रचनाबाचन, बृहत् रक्तदान, सम्मान एवम् सांस्कृतिक कार्यक्रममा मन्तव्य राख्नुहुँदै उहाँले पुस्तकालय निर्माण जस्तो सामाजिक कार्य गर्न सहज नभएको र यसकाे व्यवस्थापनका कार्यमा सरकारकाे सहयाेग लिने नाममा परनिर्भरता बढ्दा  हस्तक्षेप हुने अवस्था आउन दिन नहुने बताउनुभएको हाे ।
“पुस्तकालय निर्माण गर्ने जस्तो सामाजिक काम सहज हैन, यहाँकाे अग्रजहरुले वातावरण बनाएर पुस्तकालय स्थापना गरेकाे धन्यवाद भन्न चाहान्छु, अहिलेकाे समयमा सामुदायिक अध्ययन केन्द्रकाे आवश्यकता अझ धेरै छ, पुस्तकालयले सामुदायिक चेतना जनाउनु पर्ने र यसलाई नयाँ पुस्तालाई जाेड्नुपर्ने आवश्यकता छ। सूचनामाथि पहुँच जमाउने भन्दा प्राप्त गरेको सूचनाको बिवेचना गर्ने क्षमता हुनुपर्छ ।” उहाँले भन्नुभयो ।
उहाँले विकासकाे पछिल्लो चरणमा रहेका देशहरूले विकासमा समुदायलाई जाेड्न नसकेसम्म विकास नहुने भन्दै यसका लागि पुस्तकालय महत्त्वपूर्ण हुने बताउनुभयो।
“पुस्तकालय समुदायको एउटा अंग हाे, यसले अरुलाई पनि प्रेरित गर्छ । सामाजिक सञ्जाल र ग्याजेटहरुमा समय विताउने भन्दा पुस्तकमा समय विताउने कार्यलाई बढि जाेड दिनुपर्छ।” उहाँले भन्नुभयो ।
गाेदावरी नगरपालिकाका प्रमुख गजेन्द्र महर्जन गाेदावरी नगरपालिकालाई राष्ट्रिय तथा अन्तर्राष्ट्रिय स्तरमा चिनाउनका लागि सामुदायिक पुस्तकालयले महत्त्वपूर्ण भूमिका निर्वाह गरेकाे बताउनुभयो । पुस्तकालय मार्फत साहित्यिक क्षेत्रमा, सामामुदायिक क्षेत्रमा गाैरवपूर्ण काम गरेको बताउँदै राेजगार र तालिमका क्षेत्रमा पुस्तकालय मार्फत उल्लेखनीय काम हुने विश्वास व्यक्त गर्नुभयाे ।
स्राेत केन्द्रका अध्यक्ष बरिष्ठकुमार अधिकारीले पुस्तकालयले मानिसकाे व्यक्तित्व विकासमा याेगदान पुर्‍याउने भन्दै पुस्तकालय सिङ्गो गाउँकाे सम्पत्ति भएको बताउनुभयो ।