सदस्यतासम्बन्धी विवाद टुंग्याएर पत्रकार महासंघको निर्वाचन सुनिश्चित गर्न युनियनको आग्रह 

काठमाडौँ । नेपाल प्रेस युनियन केन्द्रीय कार्यसम्पादन समितिको बैठक काभ्रेको धुलिखेलमा सम्पन्न भएको छ । अध्यक्ष शिव लम्सालको अध्यक्षतामा शनिबार बैठक काभ्रेको धुलिखेलमा सम्पन्न भएको हो ।

कार्यसम्पादन समिति बैठकले गरेका निर्णय यस्तो : 

१. नेपाल पत्रकार महासंघको निर्वाचनमा देखिएको ढिलाइप्रति नेपाल प्रेस युनियनको गम्भीर चासो रहेको छ । सदस्यतासम्बन्धी विवाद टुंग्याएर निर्वाचनमा देखिएको अन्योल हटाई पत्रकार महासंघको निर्वाचन सुनिश्चित गर्न युनियन आग्रह गर्दछ । प्रेस युनियनले नेपाल पत्रकार महासंघलाई सबै आस्था र विचार राख्ने व्यावसायिक पत्रकारहरूको छाता संस्थाका रूपमै अघि बढाउनुपर्छ भन्ने मूल्य, मान्यतालाई आत्मसात गर्दछ । सबै क्रियाशील पत्रकार तथा पत्रकारसम्बद्ध संस्थालाई समेटेर पत्रकार महासंघको निर्वाचनमा नेतृत्वदायी भूमिका लिएर अघि बढ्न आवश्यक पहलकदमी लिने ।

२. नेपाल प्रेस युनियनका सांगठनिक गतिविधि अभिवृद्धि गर्दै संगठनलाई चलायमान बनाई पत्रकार र पत्रकारिता क्षेत्रका समस्या पहिचान गरी समाधानका लागि पहल गर्न तथा प्रेस युनियनमा नयाँ पत्रकारलाई आबद्ध गराउन प्रेस युनियनका केन्द्रीय विभाग, प्रदेश समिति र युनियनका शाखाहरूलाई परिचालन गरी २०८१ सालमा ‘पत्रकारसँग प्रेस युनियन’ अभियान सञ्चालन गर्ने ।

३. प्रेस काउन्सिल नेपालले सार्वजनिक गरेको पत्रपत्रिका वर्गीकरण मूल्यांकन न्यायोचित नभएको र विभेदपूर्ण रहेको युनियनको ठहर छ । राज्यले संरक्षण गर्नुपर्ने दायित्व रहेकोमा पत्रिकाको वर्गीकरण गर्दा ‘वर्ग’ घटाएर सार्वजनिक गरेको नतिजाका त्रुटि सच्याई आवश्यक प्रक्रिया पुर्याएर न्यायोचित रूपमा पुनः नतिजा सार्वजनिक गर्न प्रेस काउन्सिल नेपाललाई हार्दिक आग्रह गर्ने ।

४. श्रमजीवी पत्रकार ऐन कार्यान्वयन, न्यूनतम पारिश्रमिक वृद्धि, नियमित पारिश्रमिकको भुक्तानी, पेशागत सुरक्षा तथा आर्थिक, सामाजिक सुरक्षाका विषयमा नेपाल प्रेस युनियन गम्भीर र चिन्तित छ । श्रमजीवी पत्रकार ऐन कार्यान्वयन गर्न पत्रकारलाई नियमित पारिश्रमिक उपलब्ध गराउन र कानुनमा भएको व्यवस्थाअनुसार तलब सुविधा उपलब्ध गराउन सञ्चार प्रतिष्ठानलाई आग्रह गर्ने ।

५.सञ्चारमाध्यमलाई सरकारले दिँदै आएको लोककल्याणकारी विज्ञापन वितरणलाई व्यवस्थित र पारदर्शी बनाउन, सुविधा वृद्धि गर्न, अनलाइन सञ्चारमाध्यमलाई पनि लोककल्याणकारी विज्ञापन दिने व्यवस्था गर्न सरकारको ध्यानाकर्षण गर्ने ।

६.नेपाल प्रेस युनियन केन्द्रीय कार्यसम्पादन समितिको बैठक सम्पन्न गर्न आतिथ्य प्रदान गर्ने नेपाल प्रेस युनियन बागमती प्रदेश समिति र व्यवस्थापन गर्ने नेपाल प्रेस युनियन काभ्रेपलाञ्चोक शाखालाई विशेष धन्यवाद ज्ञापन गर्ने ।