संसदीय बोर्ड गठन गर्दै एमालेद्वारा सरकारको चर्को आलोचना

काठमाडौं । नेकपा (एमाले)ले संसदीय बोर्ड गठन गरेको छ । शनिबार बसेको संसदीय दलको बैठकले २१ सदस्यीय संसदीय बोर्ड गठन गरेको हो ।

पार्टीका सचेतक ऐन महरले संसदीय दललाई व्यवस्थित बनाउन र आगामी बजेट अधिवेशनमा प्रभावकारी भूमिका निर्वाह गर्न ‘संसदीय बोर्ड’ गठन गरिएको बताए ।

नवनिर्मित संसदीय बोर्डमा दलका नेता, उपनेता, राष्ट्रिय सभाका दलका नेता, प्रमुख सचेतक, सचेतक र राष्ट्रिय सभाका सचेतक गरी ६ जना पदाधिकारी रहनेछन् । बाँकी १५ सदस्यहरूमा प्रतिनिधि सभाका १०, राष्ट्रिय सभाका ४ र संयुक्त समितिका २ गरी कुल १६ वटा संसदीय समितिमा एमालेको तर्फबाट प्रतिनिधित्व गर्ने नेतृत्वकर्ताहरू (संयोजक) रहने गरी संरचना तयार गरिएको छ ।

बैठकले सरकारको पछिल्लो कार्यशैलीप्रति आपत्ति प्रकट गरेको छ । प्रमुख सचेतक महरले सरकारले संसद्लाई उपेक्षा गर्दै ‘कठपुतली’ बनाउन खोजेको आरोप लगाए । ‘संसदको अधिवेशन अन्त्य गरेर अध्यादेशमार्फत शासन चलाउने सरकारको प्रयास अलोकतान्त्रिक, अराष्ट्रिय र जनमतको अवमूल्यन हो । अध्यादेशका माध्यमबाट लोकतान्त्रिक मूल्य–मान्यतालाई कमजोर बनाउने कार्यको एमालेले सशक्त प्रतिवाद गर्नेछ,’ उनले भने ।

बैठकले सुकुम्वासी व्यवस्थापनका नाममा सरकारले ‘डोजर आतंक’ सिर्जना गरेको र मानव अधिकारको गम्भीर उल्लंघन गरेको ठहर गरेको छ ।