श्रीमती र छाेरीले नजाउ भन्दै थिए, तर उद्धारका लागि खाेलामा हाम फालेँ – चनिकलाल तामाङ

ललितपुर/ १६ असाेज, गत असाेज १२ गते नख्खु खाेलामा दुई जनाकाे ज्यान बचाएका चनिकलाल तामाङले श्रीमती र छाेरीले नजाउ भन्दाभन्दै खाेलामा हाम फालेर दुई जनालाई बचाउने काम गरेकाे बताउनुभएको छ ।
उहाँकाे सम्मानमा ललितपुर महानगरपालिकाले आज बुधबार यहाँ आयाेजना गरेको कार्यक्रममा उहाँले खाेलामा बग्दै आएकाे मान्छे देखेपछि उनीहरूलाई बचाउने काम गरेकाे बताउनुभयो ।
“ठूलाे खाेला थियो, काठहरु पनि बगाएर ल्याएकाे थियाे, मान्छेलाई खाेलाले बगाउँदै नजिकै ल्यायाे, मन थाम्न सकिनँ, श्रीमती र छाेरीले नजाउ बगाउँछ भन्दै थिए, हाम फालेर बचाएँ।” चनिकलाल भन्नुभयो ।
उहाँले मानवताकाे भावनाले ज्यान बचाएकाे भन्दै आशा नै नगरेको सम्मान महानगरले गरेकाेमा खुसी लागेकाे बताउनुभयो । “मलाई कुनै सम्मानकाे आश थिएन, तरपनि, नगद एक लाख रुपैयाँसहित गर्नुभयाे, यसमा खुसी छु।” उहाँले भन्नुभयो ।
ललितपुर महानगरले चनिकलाललाई नगद एक लाख रुपैयाँ र सम्मानपत्र सहित सम्मान गरेको हाे । सम्मान कार्यक्रममा मन्तव्य राख्नुहुँदै ललितपुर महानगरका प्रमुख चिरीबाबु महर्जनले चनिकलालले गरेको याे महत्त्वपूर्ण मानवीय कार्यकाे जति प्रशंसा गरेर पनि प्रशंसा गर्ने शब्दावली कम हुन्छ भन्दै ठूलाे जाेखिम माेलेर दुई जनाकाे ज्यान बचाएकाेमा धन्यवाद भन्नुभयो ।
“बहादुरीपूर्वक जुन काम गर्नुभयो, त्याे ज्यादै प्रशंसा याेग्य छ, तपाईंको बहादुरीले दुई जनाकाे ज्यान बच्याे, याे सम्मान भन्दा पनि ठूला हाे, तपाईंले गर्नुभएको कुरा भविष्यमा पनि सम्झिरहनेछाैं ।” उहाँले भन्नुभयो ।
सम्मान कार्यक्रममा ललितपुर महानगरका प्रबक्ता राजु महर्जन, प्रमुख प्रशासकीय अधिकृत रेखा दास श्रेष्ठ, सामान्य प्रशासन महाशाखा प्रमुख देवप्रसाद गुरागाईलगायतकाे उपस्थिति रहेकाे थियो ।