श्रम संस्कृति पार्टीले टुंग्यायो समानुपातिक सांसदको नाम

 काठमाडौं |  श्रम संस्कृति पार्टीले ४ जना समानुपातिक सांसदको नाम टुंगो लगाएको छ । धरानमा आज बसेको पार्टीको केन्द्रीय समिति बैठकले ४ जना समानुपातिक सांसदको नाम टुंगो लगाएको हो ।  पार्टी प्रवक्ता सत्य घले गुरुङका अनुसार आदिवासी जनजातीबाट पूर्णप्रसाद लिम्बू, खसआर्य महिलाबाट अम्बिकादेवी सङ्ग्रौला, दलित महिलाबाट राधिका रम्तेल र मधेसी महिलाबाट रुवीकुमारी ठाकुर चयन भएका छन् ।

श्रम संस्कृतिले प्रत्यक्षतर्फ भने ३ सिट जितेको छ ।  खोटाङ, भोजपुर र सुनसरी १ मा प्रत्यक्ष तर्फ जित हासिल गरेको थियो ।

समानुपातिकतर्फ पार्टीभित्र महिला कार्यकर्ताहरू सांसदका आकांक्षी धेरै देखिएपछि सीमित सिटमा मिलाउन नेतृत्वलाई केही सकस भएको बताइएको छ। यसअघि आदिवासी जनजाति महिला क्लस्टरमा मकवानपुरकी मन्दिरा मोक्तान, काठमाडौंकी आशा लामा र सुनसरीकी समला राईको नाम चर्चामा रहेको थियो।

यता पुरुषतर्फ भने खसआर्य क्लस्टरमा दृष्टिसम्बन्धी अपाङ्गता भएका मोरङका जीवन विष्टसँग भद्र सहमति भएपछि अन्ततः क्याप्टेन लिम्बूको नाम सिफारिस गरिएको स्रोतले जनाएको छ।

प्रहिलो पटक चुनाव लडेको श्रम संस्कृति पार्टीले प्रतिनिधि सभामा ७ सांसदसहित आफ्नो उपस्थिति जनाएको छ ।