विशंखुनारायणमा सुविधासम्पन्न प्रशासनिक भवन सिलान्यास

ललितपुर/ ३ मङ्सिर : गाेदावरी नगरपालिकाकाे वडा नं. २ विशंखुनारायणमा सुविधासम्पन्न प्रशासनिक भवन निर्माणकाे सिलान्यास गरिएको छ । जिल्ला समन्वय समिति (जिसस) ललितपुरको ६० प्रतिशत र गाेदावरी नगरपालिकाकाे ४० प्रतिशत लागतमा निर्माण हुनेगरी समन्वय समितिका प्रमुख ऋषिदेव फूँयालले आज भवनकाे सिलान्यास गर्नुभएको हाे ।
भवनकाे सिलान्याससंगै आयाेजित कार्यक्रममा मन्तव्य राख्नुहुँदै जिल्ला समन्वय समिति प्रमुख फूँयालले तीन तहका सरकार मध्ये नागरिकलाई प्रत्यक्ष सेवा प्रवाह गर्ने स्थानीय सरकारकाे माताहातकाे वडा कार्यालयकाे प्रशासनिक कामलाई सहज र प्रभावकारी बनाउनका लागि नगरपालिकासंगकाे साझेदारी भवन निर्माणका लागि जिल्ला समन्वयमार्फत रकम उपलब्ध गराइएको बताउनुभयाे ।
“अहिले काम सुरु गर्नका लागि जिल्ला समन्वय समिति ललितपुरको ७५ लाख र गाेदावरी नगरपालिकाकाे ५० लाख सहित हाल १ कराेड पच्चीस लाख रुपैयाँ विनियोजन भएको छ, याे रकमकाे काम सम्पन्न भएपछि बाँकी रकम विनियोजन हुन्छ,यहाँकाे स्थानीय विकास निर्माणमा जिससले सधैं  विशेष चासाे राख्नेछ।” प्रमुख फूँयालले भन्नुभयो ।
सही ढंगले बजेट कार्यान्वयनमा जनप्रतिनिधि र कर्मचारीकाे भूमिका हुनेछ भन्ने विश्वास छ भन्नुहुँदै उहाँले हामीले गरेकाे सहयाेगले यहाँकाे नागरिकले लाभ हासिल गर्न सक्नुपर्छ भन्ने धारणा राख्नुभयो ।
उहाँले जिल्लाका सांसदहरू र जनप्रतिनिधिहरुले गरेको काममा समन्वय गरेर सहयाेग जिल्ला समन्वय समितिले उपलब्ध गराउँदै आएकाे बताउँदै वडा कार्यालयका प्रशासनिक भवन, स्वास्थ्य कार्यालयहरु, खानेपानीका कामहरुका लागि बजेट साझेदारीमा काम गर्न सकिने बताउनुभयो ।
उहाँले जिल्ला समन्वयमार्फत विकासका लागि संघ र प्रदेशमा कुरा उठाएकाे जानकारी गराउँदै
नतिजा निस्किने गरि विकास निर्माणका काममा सहयाेग, समन्वय र सहकार्य गरिने वताउनुभयाे। फूँयालले स्थानीय सरकारलाई बढि बजेट दिएर विकासका कामलाई प्रभावकारी र सबल बनाउन ध्यान दिन्छौं भन्नेमा जाेड दिनुभयाे।
गाेदावरी नगरप्रमुख गजेन्द्र महर्जनले गुणस्तरमा कमजोरी नगरी समयमै भवन निर्माण सम्पन्न गर्न आग्रह गर्नुभयाे । “निर्धारित समयभित्रै काम सम्पन्न हुनेछ भन्ने विश्वस छ, याे भवन निर्माणसंगै सेवा प्रवाहमा नागरिकलाई सहजता मिल्नेछ।” उहाँले भन्नुभयो । नगरप्रमुख महर्जनले पालिकाका १४ वटा वडा कार्यालयकाे भवन निर्माण गर्ने क्रममा अब वडा नं. ३ काे मात्रै भवन निर्माण हुन बाँकी रहेकाे जानकारी गराउनुभयाे।
वडा नं. २ का अध्यक्ष मनाेहर सिलवालले विकास निर्माणका क्रममा सबैसँग हातेमालो गर्दै अगाडि बढ्ने बताउँदै सिलान्यास भएको भवन छिटोभन्दाछिटाे निर्माण सम्पन्न गरेर स्थानीयलाई सेवा प्रवाह गर्ने विश्वास दिलाउनुभयाे ।
भवन निर्माणकाे लागि के एस एम  सर्भिस प्रा.लि. ले ठेक्का पाएको छ भने १ करोड ८० लाख १७ हजार ७ सय ४० रुपैयाँ लागतमा भवन निर्माण सम्पन्न हुनेछ ।