विपक्षीको विरोधबीच प्रतिनिधिसभा नियमावली पारित, सभामुखलाई व्याख्याको अन्तिम अधिकार

काठमाडौं । विपक्षी दलहरूको विरोधका बीच प्रतिनिधिसभाले नयाँ प्रतिनिधिसभा नियमावली पारित गरेको छ। शुक्रबार बसेको प्रतिनिधिसभा बैठकले पारित गरेको नियमावलीमा संसद् र सांसदहरूको कार्यसम्पादनसम्बन्धी केही विशेष व्यवस्था समावेश गरिएको छ।

नियमावलीको नियम २५९ मा सभा, समिति तथा सांसदका हकमा नियमावलीलाई विशेष कानुनसरह लागू हुने व्यवस्था गरिएको छ। उक्त व्यवस्थाअनुसार प्रचलित कानुनमा जे उल्लेख भए पनि सभा, समिति र सदस्यका विषयमा यो नियमावली संघीय कानुनको रूपमा प्रभावकारी रहनेछ।

त्यस्तै, नियम २६० ले नियमावलीको व्याख्या गर्ने अधिकार सभामुखलाई प्रदान गरेको छ। सो प्रावधानअनुसार नियमावलीको व्याख्यासम्बन्धी सभामुखको निर्णय अन्तिम हुने र त्यसबारे संसद् बैठकलाई जानकारी गराउनुपर्ने व्यवस्था गरिएको छ।

नियम २६१ मा संसद् र समितिबाट सम्पादन हुने कार्यलाई आन्तरिक कामकारबाहीका रूपमा परिभाषित गरिएको छ। साथै, यस्ता कार्यसम्पादनसँग सम्बन्धित विषयमा कुनै पनि अदालतमा प्रश्न उठाउन नपाइने व्यवस्था गरिएको छ।

नयाँ नियमावलीका यी प्रावधानहरूलाई लिएर संसद्भित्र र बाहिर बहस सुरु भएको छ भने विपक्षी दलहरूले यसप्रति असन्तुष्टि जनाएका छन्।