विद्युत् नियमन आयोगमा नयाँ पदाधिकारी नियुक्ति प्रक्रिया सुरु

काठमाडौं । ऊर्जा, जलस्रोत तथा सिँचाइ मन्त्रालयले विद्युत् नियमन आयोगका रिक्त पदाधिकारी नियुक्तिका लागि खुला प्रतिस्पर्धामार्फत छनोट प्रक्रिया अघि बढाएको छ ।

सार्वजनिक पदाधिकारीको पदमुक्तिसम्बन्धी अध्यादेश जारी भएपछि आयोगका पदाधिकारी पदमुक्त भएका थिए । त्यसपछि ऊर्जा, जलस्रोत तथा सिँचाइमन्त्री विराजभक्त श्रेष्ठ ले नयाँ पदाधिकारी छनोटका लागि तीन सदस्यीय सिफारिस समिति गठन गरेका हुन् ।

मन्त्रालयका सचिव चिरञ्जीवी चटौतको संयोजकत्वमा गठित समितिमा ऊर्जा मन्त्रालयका सहसचिव सागरराज गौतम र ऊर्जाविज्ञ सतिषनारायण जोशी सदस्य रहेका छन् ।

मन्त्रालयका अनुसार आयोगको अध्यक्षसहित चार सदस्य नियुक्तिका लागि चाँडै १५ दिने सूचना जारी गर्दै आवेदन आह्वान गरिनेछ ।