लगातार दोस्रो दिन नेप्सेमा गिरावट, १९.६७ अंकले घट्यो

काठमाडौं । नेपाल स्टक एक्सचेञ्ज (नेप्से) परिसूचकमा बिहीबार पनि गिरावट आएको छ। आज नेप्से १९.६७ अंकले घटेर २,६०१.९२ विन्दुमा कायम भएको हो।

आज ३६१ कम्पनीका ८७ लाख ८१ हजार ३८० कित्ता शेयर खरिद–बिक्री हुँदा कुल ४ अर्ब ६१ करोड १९ लाख ५४ हजार ७८२ रुपैयाँ बराबरको कारोबार भएको नेपाल स्टक एक्सचेञ्जले जनाएको छ।

कारोबार भएका सबै उपसमूहका सूचकहरू घटेका छन्, जसले समग्र बजारमा बिक्री दबाब रहेको संकेत गरेको छ।

आजको कारोबारमा उपकार लघुवित्त वित्तीय संस्थाको शेयर मूल्य सबैभन्दा धेरै १२.६८ प्रतिशतले वृद्धि भएको छ। त्यस्तै स्नो रिभरको शेयर मूल्य ११.७६ प्रतिशतले बढेको छ।

यता, बीओके डिबेञ्चर २०८६को मूल्य सबैभन्दा धेरै ८.६६ प्रतिशतले घटेको छ।

कारोबार रकमका आधारमा ग्लोबल आइएमई डिबेञ्चर २०८६/८७ अग्रस्थानमा रहँदै ३५ करोड ५८ लाख रुपैयाँभन्दा बढीको कारोबार भएको छ। त्यसपछि एसबिएल डिबेञ्चर २०८९को २८ करोड ६५ लाख रुपैयाँ बराबरको कारोबार भएको छ।