रास्वपाको दोस्रो चरण निर्वाचन तालिका सार्वजनिक, राति सवा ९ बजेदेखि मतदान

चितवन ।  राष्ट्रिय स्वतन्त्र पार्टी (रास्वपा) ले दोस्रो चरणअन्तर्गत पार्टी पदाधिकारी निर्वाचनको तालिका सार्वजनिक गरेको छ । केन्द्रीय निर्वाचन आयोगका अनुसार पदाधिकारी पदका लागि आज राति सवा ९ बजेदेखि मध्यराति सवा १२ बजेसम्म मतदान हुने तय गरिएको छ ।

निर्वाचन तालिकाअनुसार पदाधिकारी पदका लागि उम्मेदवारी फारम वितरण साँझ ६ः३० बजेदेखि ७ बजेसम्म हुनेछ । उम्मेदवारको प्रारम्भिक नामावली साँझ ७ः३० बजे प्रकाशन गरिनेछ भने उम्मेदवारविरुद्ध दाबी–विरोध गर्ने समय साँझ ८ बजेसम्म तोकिएको छ ।

दाबी–विरोधमाथिको जाँचबुझ सवा ८ बजे गरिने आयोगले जनाएको छ । उम्मेदवारी फिर्ता लिने अन्तिम समय साँझ ८ः३० बजे निर्धारण गरिएको छ भने उम्मेदवारको अन्तिम नामावली साँझ पौने ९ बजे प्रकाशित गरिनेछ । त्यसपछि सवा ९ बजेसम्म मौन अवधि रहनेछ ।

आयोगका अनुसार मतगणना राति सवा १२ बजेदेखि सवा १ बजेसम्म हुनेछ भने अन्तिम मतपरिणाम राति १ः३० बजे घोषणा गरिनेछ ।

यसअघि आज सम्पन्न पहिलो चरणको मतदानमा करिब एक हजार महाधिवेशन प्रतिनिधि अनुपस्थित रहेपछि दोस्रो चरणको मतदान व्यवस्थापन र सहभागितालाई लिएर प्रश्न उठ्न थालेका छन् ।

रास्वपाको विधानअनुसार पदाधिकारीतर्फ २ उपसभापति, १ महामन्त्री र ३ सहमहामन्त्री पदका लागि मात्र निर्वाचन हुने व्यवस्था छ ।