रास्वपाका सबै सांसदले दिए सामूहिक राजीनामा

काठमाडौं । राजधानीलगायत देशभर जेनजी आन्दोलन चर्किएसँगै राष्ट्रिय स्वतन्त्र पार्टी (रास्वपा) का सबै प्रतिनिधिसभा सदस्यहरूले सामूहिक राजीनामा दिने घोषणा गरेका छन् ।

रास्वपाले सार्वजनिक विज्ञप्तिमार्फत सरकारको बर्बर दमन, अभिव्यक्ति स्वतन्त्रतामाथिको नियन्त्रण, र व्यापक भ्रष्टाचारविरुद्ध कडा रूपमा उत्रिँदै सामूहिक राजीनामा प्रस्तावसहित ६ बुँदे माग प्रस्तुत गरेको हो ।

रास्वपाले संसदको वैधता समाप्त भइसकेको निष्कर्षमा पुगेको बताउँदै, नयाँ राजनीतिक निकासका लागि शिघ्र अन्तरिम नागरिक सरकार गठनको प्रस्तावसमेत अघि सारेको छ ।

साथै, जेनजी आन्दोलनका क्रममा मारिएका प्रदर्शनकारीप्रति श्रद्धाञ्जली अर्पण गर्दै घाइतेहरूको निःशुल्क उपचारको मागसमेत गरिएको छ ।

संसदीय दलका नेता रवि लामिछाने, उपनेता विराजभक्त श्रेष्ठ, डा. स्वर्णिम वाग्ले, डा. तोसिमा कार्की, शिशिर खनाल, सुमना श्रेष्ठ, सोबिता गौतम, निशा डाँगी लगायत २० सांसदहरूको संयुक्त हस्ताक्षर रहेको विज्ञप्तिमा सामूहिक राजीनामाको निर्णय सार्वजनिक गरिएको हो ।