राष्ट्रिय सभाको १९औँ अधिवेशन आजदेखि हुदै

काठमाडौं । राष्ट्रिय सभाको १९औँ अधिवेशन आज आइतबारदेखि सुरु हुँदैछ। नयाँ बानेश्वरस्थित अन्तर्राष्ट्रिय सम्मेलन केन्द्रमा रहेको संसद् भवन जेनजी आन्दोलनका क्रममा जलेर ध्वस्त भएपछि यसपटक अधिवेशन सङ्घीय संसद् सचिवालय, सिंहदरबारमा सञ्चालन गरिने भएको हो।

संसद सचिवालयका अनुसार बिहान ११ बजेदेखि शुरु हुने बैठकमा राष्ट्रपतिको कार्यालयबाट प्राप्त पत्र पढेर सुनाउने र राष्ट्रिय सभा सदस्य बलदेव बोहराको निधनप्रति शोक प्रस्ताव प्रस्तुत गर्ने कार्यसूची रहेको छ । अधिवेशनको तयारीका लागि अध्यक्ष नारायणप्रसाद दाहालले शुक्रबार नै कार्यव्यवस्था परामर्श समितिको बैठक आह्वान गरिसकेका छन् । अधिवेशनको पहिलो बैठकमा अध्यक्ष दाहालले राष्ट्रपतिबाट अधिवेशन आह्वानको पत्र पढेर सुनाउने र हालै निधन भएका नेपाली कांग्रेसका सांसद बलदेव बोहराप्रति शोक प्रस्ताव प्रस्तुत गर्ने कार्यसूची तय भएको छ ।

यसैबीच, निर्वाचन आयोगले माघ ११ गते राष्ट्रिय सभाका १९ सदस्यका लागि निर्वाचनको तयारी गरेको जनाएको छ। एक जना सदस्य निर्विरोध निर्वाचित भइसकेका छन्। नयाँ सदस्य चयनको प्रक्रियासँगै यो अधिवेशनलाई विशेष महत्वका साथ हेरिएको छ।